Ադրբեջանի ԶՈՒ ստորաբաժանումները ինտենսիվ կրակ են բացել հայկական դիրքերի ուղղությամբ: ԱԺ-ում հայտարարության նախագիծ են պատրաստել: Խորհրդարան է եկել ՀՀ վարչապետ Նիկոլ Փաշինյանը՝ ներկայացնելու իրավիճակը եւ պատասխանելու պատգամավորների հարցերին:
Փաշինյանն ԱԺ-ում հիշեցրեց, որ 2016-ի քառօրյա պատերազմին, երբ ինքը պատգամավոր էր, գնացել էր կամավոր. «Ընդ որում, ոչ մի անգամ չենք ասել՝ մեր ավտոմատը սենց էր, մեր կոշիկը սենց էր: Չէ, կոշիկի համար ասել եմ՝ որպես պատգամավոր: Հիմա այդպես է ստացվել, գնացել ենք, եկել ենք, բայց որ գնացել ենք, զենքը ձեռքներիս խրամատներում նստել ենք, ո՞վ էր երաշխիք տվել, որ…Մեր կամքով գնացել էինք՝ հանուն հայրենիքի, ընդ որում, լինելով ընդդիմադիր պատգամավորներ՝ ընդդիմադիր կուսակցության»: Հիշեցնենք, որ «Քաղաքացիական պայմանագիր» կուսակցության կամավորական ջոկատը առաջնագիծ է մեկնել ռազմական գործողությունների ավարտից հետո՝ 2016–ի մայիսին, ինչի մասին հիշատակվում է անգամ վարչապետի պաշտոնական կենսագրությունում։
Հայկ Սարգսյանն էլ հիշեցրեց, որ իր ընտանիքն էլ է ներգրավված եղել պատերազմում, իր հայրը պատերազմի մասնակից է, վերջինն է դուրս եկել Արծվաշենից, իսկ վերջին պատերազմում իր հարազատ քրոջ ամուսինն է մասնակցել, մյուս քրոջ որդին. «Ընտանիքի մեջից գիտեմ, թե ինչ է նշանակում ունենալ ընտանիքի անդամ՝ սահմանում: Տեսել եմ ինչպես է արտասվում իմ քույրը, երբ իր ամուսնուն մի շաբաթ չի կարողանում զանգահարել»:
Հետո նա անդրադարձավ Փաշինյանի որդու՝ Աշոտի՝ պատերազմի մասնակցությանը. «Մենք տեսել ենք, որ դուք եք ամենաթեժ մարտական գործողություններին ձեր որդուն ուղարկել սահման: Շատերը չեն հավատում, ես անձամբ մի քանի տեղից գիտեմ, որ Աշոտը մասնակցել է մարտերին, իր կողքին կանգնած հայ զինվորը ընկել է պայքարում, զոհվել է եւ դրա փոխարեն շատ հանգիստ կարող էր լինել ձեր որդին: Այսօր ինձ շատերը զանգում կամ գրում են, ովքեր պատերազմի մասնակից են, ցանկություն են հայտնում մեկնել առաջնագիծ: Ինֆորմացիաներ են գալիս, որ շատ կամավորներ զենք են ուզում, որ գնան: Կամքը կա, պատմությունը ցույց է տվել, որ մենք պատրաստ ենք պայքարելու եւ զոհվելու՝ հանուն հայրենիքի»:
Կարդացեք նաև
Հռիփսիմե ՋԵԲԵՋՅԱՆ
