Դիմադրության շարժման առաջնորդ Իշխան Սաղաթելյանը վերջին հանրահավաքին ներկայացնելով իմպիչմենտի գործընթացը, ասել էր, որ իրենց անհրաժեշտ է 36 ստորագրություն՝ մեկնարկի համար, որից հետո 72 ժամվա ընթացքում այն կարող են ավարտին հասցնել: Նրա խոսքով՝ քանի որ ՔՊ-ականներին համոզելով չի լինի, դրան կհասնեն ճնշումով ու պարտադրանքով:
Այս առնչությամբ Aravot.am-ը ՔՊ խմբակցության պատգամավոր Գագիկ Մելքոնյանին հարցրեց՝ մտահոգություններ չունե՞ք, որ պարտադրանքով իմպիչմենտի կգնաք: Նա պատասխանեց. «Չգիտեմ, հլը նման թեմա չկա»: Նրա համոզմամբ՝ ընդդիմությունը չի կարող ՔՊ-ականներին ներքաշել իր դաշտ՝ անհրաժեշտ ստորագրություններն ունենալու համար. «Սուտ է, չեն կարա, համոզված եմ»: Զարմանքին՝ ինչո՞ւ, ձերոնք սրբե՞ր են, ի՞նչ են՝ նա արձագանքեց. «Սրբեր չեն, դավաճաններ չեն»: Ճշտեցինք՝ երբ քաղաքական գործիչները տարբեր ճամբարներ են փոխում, դավաճա՞ն են՝ Գագիկ Մելքոնյանը պատասխանեց. «Դե դրանք դավաճան են էլի համարվում»:
Հիշեցնենք, որ Գագիկ Մելքոնյանը 2008-ին ՊՆ փոխնախարար, գեներալ Մանվել Գրիգորյանի հետ միացավ ընդդիմությանը՝ հայտարարելով, որ իրենք ժողովրդի անվտանգության երաշխավորն են: Հիմա նրա գնահատմամբ՝ ճամբարափոխները դավաճաններ են: Երբ ասացինք՝ ձեր խմբակցությունում էլ կան պատգամավորներ, որ այլ կուսակցությունից են եկել իրենց թիմ՝ Մելքոնյանը հորդորեց անուններ տալ: Թվարկեցինք՝ սկսած խմբակցության ղեկավար Հայկ Կոնջորյանից, որը ՔՊ-ի շարքերը համալրեց՝ հեռանալով «Լուսավոր Հայաստանից»: «Չէ հա: Թե՞ Բարգավաճից էր, ես գիտեի՝ ԲՀԿ-ից էր»,-արձագանքեց Գագիկ Մելքոնյանը:
Հռիփսիմե ՋԵԲԵՋՅԱՆ
