Սիսիան համայնքի ավագանու ընտրություններին առաջադրված՝ Արման Բաբաջանյանի «Հանուն Հանրապետության» կուսակցության ընտրացուցակը գլխավորող Սեւակ Մուսաթյանն ընտրական հանդիպումներից մեկի ժամանակ՝ տարակուսանք հայտնեց, նշելով, որ «Ժամանակին վարչապետի հրաժարականի տակ էին ստորագրում, հիմա «Քաղաքացիական պայմանագրի» ցուցակում են»։
Ըստ երեւույթին, խոսքը վերաբերում է Սիսիանի ավագանու դեռեւս գործող անդամ Գեւորգ Գեւորգյանին, որը 2020 թվականի դեկտեմբերի 5-ին, ի թիվս ավագանու այլ անդամների պահանջել է վարչապետ Նիկոլ Փաշինյանի հրաժարականը։
Գեւորգ Գեւորգյանը Սիսիանի ավագանու անդամի ընտրություններին առաջադրված «Քաղաքացիական պայմանագիր» կուսակցության ընտրացուցակի 10-րդ համարն է։
«Այո՛, ստորագրել եմ հրաժարականի տակ, այն ժամանակ ուրիշ էր, հիմա՝ ուրիշ է։ Այն ժամանակ, որ ստորագրել էինք, հասել էին Սիսիանի սահման ու հիմա այդտեղ նստած են։ Բայց ստորագրելուց հետո տեսա, թե ովքեր են ուզում գալ իշխանության գլուխ՝ իմ կարծիքը փոխվել է»,-Aravot.am-ի հետ զրույցում ասաց ավագանու անդամի թեկնածու Գեւորգ Գեւորգյանը։
Կարդացեք նաև
Սիսիանի համայնքապետարանի կայքէջում, Գեւորգ Գեւորգյանը ներկայացված է որպես անկուսակցական։ Սեպտեմբերի 25-ին կայանալիք Սիսիանի ավագանու անդամի ընտրություններին առաջադրված «Քաղաքացիական պայմանագիր» կուսակցության ընտրացուցակում Գեւորգյանը կենտրոնական ընտրական հանձնաժողովի կայքում տեղադրված ցուցակում նշված է որպես «Քաղաքացիական պայմանագիր» կուսակցության անդամ։ «Ո՛չ, չգիտեմ դա ինչպես է ստացվել, ես անկուսակցական եմ»,–ասաց նա։ Ի դեպ, կառավարող ուժի ընտրացուցակը գլխավորում է Սիսիան համայնքի ղեկավարի պաշտոնակատար, «Քաղաքացիական պայմանագրի» անդամ Արմեն Հակոբջանյանը։
Հիշեցնենք, որ Սիսիան համայնքի ավագանու անդամի ընտրություններում առաջադրվել է 7 քաղաքական ուժ․ «Ապրելու երկիր», «Քաղաքացիական պայմանագիր», «Հայ Յեղափոխական Դաշնակցություն», «Հանուն Ազատության» կուսակցություններն ու 2 դաշինք՝«Աշխատանք եւ Արդարություն» դաշինքը՝ կազմված «Համերաշխություն» եւ «Վերածնվող Հայաստան» կուսակցություններից, «Զարգացող համայնք» դաշինքը՝ կազմված «Արդարություն» եւ «Քաղաքացու որոշում սոցիալ դեմոկրատական» կուսակցություններից։
Արմեն ԴԱՎԹՅԱՆ
