«ՀՀ-ում իշխանության եկած խմբավորումը, օգտագործելով ընձեռված լծակները, ձևավորել է հանցավոր խմբավորում, որն իր շոշափուկներն է տարածել առաջին հերթին իրավապահ համակարգում՝ ի դեմս քննիչների, քննչական խմբերի ղեկավարների, որոնց տրվում են ապօրինի քաղաքական բնույթի հանձնարարությունները: Դրանց ապացույցները բազմաթիվ են»,- Երևան քաղաքի դատարանի Կենտրոն նստավայրում (դատավոր Կարեն Ֆարխոյան) ընթացող Թադեւոս Ավետիսյանի օգնական, ՀՅԴ անդամ Գերասիմ Վարդանյանի վերաբերյալ քրեական գործով դատական նիստի ընթացքում հայտարարեց ամբաստանյալ, «Երկիր Մեդիա» հեռուստաընկերության տնօրեն Բագրատ Եսայանը:
Հիշեցնենք՝ ՀՅԴ անդամ Գերասիմ Վարդանյանը ձերբակալվել է դեռեւս մեկուկես տարի առաջ հարուցված քրեական գործի շրջանակում․ մեղադրվում է 2020թ․ նոյեմբերի 9-ին տեղի ունեցած իրադարձությունների ժամանակ զանգվածային անկարգություններ կազմակերպելու և լրագրողի աշխատանքը խոչընդոտելու մեջ («Ազատություն» ռ/կ-ի գրասենյակ ներխուժման փորձ): Նա կալանավորվել է այս տարվա մայիսին՝ Դիմադրության շարժման անհնազանդության գործողությունների ժամանակ։ Վերջերս դատարանը եւս երկու ամսով երկարացրեց Գերասիմ Վարդանյանի կալանքի ժամկետը:
Նա մի դրվագ ներկայացրեց Գերասիմ Վարդանյանի հետ կապված. «Փորձ արեցին Գերասիմ Վարդանյանին մեղադրել Արարատ Միրզոյանի դեմ մահափորձի մեջ՝ ինչ-որ դրվագով: Ինչ- որ մեկ՝ բավականին բարձրաստիճան պետական պաշտոնյա, ցուցմունք տվեց, որ Գերասիմը մասնակցել է նրա դեմ մահափորձին: Հետագայում, երբ ապացուցվեց, որ Գերասիմ Վարդանյանը օբյեկտիվորեն չէր կարող գտնվել այն վայրում, որտեղ այդ պահին Արարատ Միրզոյանն էր, այդ մասով դադարեցվեց ամեն ինչ, բայց անձը մնաց ազատության մեջ»:
Բագրատ Եսայանն այս քրեական գործերը համարեց ակնհայտորեն պատվիրված ու նշեց. «Պատվերները, որ գալիս են հանցավոր բանդայի և նրա ղեկավարի՝ վարչապետի պաշտոնը զբաղեցնողի կողմից, իջեցնում են իրենց վերջին շոշափուկներին՝ իրավական, դատական համակարգին, և փորձ է արվում այդ հանձնարարություններն իրացնել տարբեր մարդկանց միջոցով՝ նրանց ներգրավելով այս հանցավոր սխեմաների մեջ: Գալու է ժամանակ, որ բոլորը պատասխան են տալու»:
Կարդացեք նաև
Տաթև ՀԱՐՈՒԹՅՈՒՆՅԱՆ
