Արդարադատության նախարարությունը ներկայացնում է
Արդարադատության նախարարության քրեակատարողական ծառայության օպերատիվ, անվտանգության և պահպանության բաժինների ծառայողները շարունակում են անզիջում պայքարը քրեակատարողական հիմնարկներում արգելված իրերի, թմրամիջոցների շրջանառության, ինչպես նաև թղթախաղերի դեպքերի բացառման ուղղությամբ: Հավատարիմ մնալով Կառավարության կողմից որդեգրած թափանցիկ և հաշվետու կառավարման քաղաքականությանը՝ Արդարադատության նախարարությունը ներկայացնում է օգոստոս ամսվա ընթացքում Հայաստանի քրեակատարողական հիմնարկներում հայտնաբերված թմրամիջոցների և այլ արգելված իրերի վերաբերյալ հաշվետու զեկույց:
«Արմավիր», «Նուբարաշեն» և «Վանաձոր» քրեակատարողական հիմնարկների օպերատիվ և անվտանգության ապահովման բաժինների ծառայողներն անձնական զննության են ենթարկել դատապարտյալների մոտ կարճատև տեսակցության եկած քաղաքացիներին: Արդյունքում տեսակցության եկած անձանց մոտ հայտնաբերվել են կասկածելի փաթեթներ, որոնցում առկա են եղել բջջային հեռախոսներ և թմրամիջոցին նմանվող տարբեր զանգվածներ:
Մեկ այլ դեպքով՝ «Արմավիր» քրեակատարողական հիմնարկի օպերատիվ բաժնի ծառայողները, իրացնելով քրեակատարողական ծառայության կենտրոնական մարմնի օպերատիվ բաժնից ստացված տեղեկությունները, խուզարկության են ենթարկել հիմնարկի տեխնիկատնտեսական աշխատանքներում ներգրավված դատապարտյալին: Արդյունքում վերջինիս մոտ առկա դույլի միջից հայտնաբերվել է փաթեթ, որում եղել են հերոյին, մեթամֆետամին և մարիխուանա տեսակի թմրամիջոցներին նմանվող զանգվածներ, ինչպես նաև բջջային հեռախոս, բաժանորդային քարտ, wi-fi սարք, ականջակալ և բջջային հեռախոսի 5 լիցքավորման լար:
Կարդացեք նաև
Ավելի վաղ՝ նույն հիմնարկի օպերատիվ բաժնի ծառայողները զննության էին ենթարկել դատապարտյալներից մեկին և վերջինիս ափից հայտնաբերել կասկածելի փաթեթ, որում ևս առկա էր մետամֆետամին տեսակի թմրամիջոցին նմանվող, սպիտակ բյուրեղանման զանգված։
Վերը թվարկված բոլոր դեպքերով քրեական գործի շրջանակում նախապատրաստվում են նյութեր, նշանակված են դատաքիմիական փորձաքննություններ:
Մանրամասն զեկույցը ներկայացված է կից պատկերում:
Արդարադատության նախարարություն
