Aravot.am-ը Երեւանի պետական համալսարանի հանրային կապերի և մարքեթինգի վարչության պետ Ազնիվ Գրիգորյանից հետաքրքրվեց` ինչո՞ւ դասաժամեր չեն տրվել իրավապաշտպան, փաստաբան, իրավաբանական գիտությունների թեկնածու, դոցենտ Ռուբեն Մելիքյանին եւ բանասիրական ֆակուլտետի դասախոս, Սփյուռքի նախկին փոխնախարար, հասարակական գործիչ Սերժ Սրապիոնյանին, արդյոք դա արվել է քաղաքակա՞ն դրդապատճառներով, եւ ԵՊՀ-ում փորձում են ազատվել ընդդիմադիր հայացքներ ունեցող դասախոսներից:
«Այո, դուք ճիշտ եք, ձեր նշած անձանց դասաժամեր չեն հատկացվել, բայց դա որեւէ քաղաքական ենթատեքստ չի կարող պարունակել եւ չի էլ պարունակում: Առհասարակ համալսարանը ապաքաղաքական կառույց է, մենք այդ մասին բազմիցս հայտարարել ենք, ռեկտորն էլ է հայտարարել: Նաեւ հավելեմ, որ ռեկտորի կողմից որեւէ մեկին քաղաքական ենթատեքստ պարունակող որեւէ հորդոր չի արվել: Այնպես որ՝ դասաժամ չտրամադրելը դրանով պայմանավորված լինել չի կարող»,-ասաց Ազնիվ Գրիգորյանը:
Մեր պնդմանն ի պատասխան, եթե քաղաքական ենթատեքստ չկա, այդ դեպքում ուրիշ ի՞նչ պատճառով են իրենց ոլորտում կայացած մարդիկ զրկվել դասաժամերից, հանրային կապերի և մարքեթինգի վարչության ղեկավարն առաջարկեց գրավոր նամակ ուղարկել, որպեսզի ԵՊՀ-ն գրավոր պատասխանի հարցի այդ մասին:
Հավելենք, որ Ռուբեն Մելիքյանն Օragir.am-ի հետ զրույցում ասել էր, որ այլ պատճառ, քան քաղաքականը չի տեսնում, իսկ Սերժ Սրապիոնյանը «Փաստինֆո»–ին հայտնել էր, որ ԵՊՀ ռեկտոր Հովհաննես Հովհաննիսյանը ֆակուլտետի դեկանի և ամբիոնի վարիչի միջոցով է փորձել իրեն փոխանցել, որ իշխող կուսակցության ու Նիկոլ Փաշինյանի իշխանության դեմ չխոսի, այլապես կզրկվի դասաժամերից։ Դոցենտի հետ, ի վերջո, պայմանագիր կնքվել է՝ դեկանի եւ ամբիոնի վարիչի դիմադրության արդյունքում, որոնք նշել են, որ բուհում Սրապիոնյանի փոխարեն այլ մասնագետ չկա տվյալ շրջանը դասավանդելու համար։
Կարդացեք նաև
Գոհար ՀԱԿՈԲՅԱՆ
