Այսօր ԱԺ աշխատանքի եւ սոցիալական հարցերի հանձնաժողովի նիստում քննարկվեց «Աշխատանքային օրենսգրքում» լրացում կատարելու մասին նախագիծը, որը մարդկանց թրաֆիքինգի դեմ պայքարի ռազմավարությունից է բխում, կա միջազգային քաղաքական պարտավորություն: Ինչպես ներկայացրեց հիմնական զեկուցող՝ աշխատանքի եւ սոցիալական հարցերի փոխնախարար Ռուբեն Սարգսյանը, սահմանվում է «հարկադիր աշխատանք» եզրույթը, չնայած օրենսգրքում նշված է ցանկացած ձեւի հարկադիր աշխատանքի եւ աշխատողների նկատմամբ բռնության արգելքի մասին: Պարզապես նշված չէ, թե ինչն է հարկադիր, պարտադիր աշխատանքը՝ թրաֆիքինգը:
Ռուբեն Սարգսյան
Ինչպես ՀՀ գործող, այնպես էլ 2022-ի հուլիսի 1-ից ուժի մեջ մտնող Քրեական օրենսգրքերում արդեն իսկ հարկադիր աշխատանքը համարվում է մարդու շահագործում եւ քրեորեն պատժելի հանցանք: Անհրաժեշտություն է առաջանում լրացումներ կատարել «Մարդկանց թրաֆիքինգի եւ շահագործման ենթարկված անձանց նույնացման եւ աջակցության մասին» օրենքում եւ համապատասխանեցնել պարտադիր կամ հարկադիր աշխատանքների եզրույթը՝ միասնականության ապահովման համար:
Հերիքնազ Տիգրանյան
Հանձնաժողովի նախագահ Հերիքնազ Տիգրանյանն ասաց, որ հարկադիր կամ պարտադիր աշխատանքի հարցում էական չէ՝ կա՞ աշխատանքային պայմանագիր, թե՞ ոչ. «Եթե չկա աշխատանքային պայմանագիր, դա անօրինական աշխատանք է, բայց եթե պայմանագիրն առկա է ու աշխատանքը կատարվում է անձի կամքին հակառակ, նա չի տվել դրա համաձայնությունը, ուրեմն գործ ունենք պարտադիր կամ հարկադիր աշխատանքի հետ»:
Լիլիթ Ստեփանյան
Հարակից զեկուցող Լիլիթ Ստեփանյանն էլ ասաց, որ բոլոր ժողովրդավարական երկրներում բնականաբար պիտի արգելվի հարկադիր կամ պարտադիր աշխատանքը: ՀՀ օրենսդրությամբ կան բացառություններ, թե որոնք են այն աշխատանքները, որոնք անձի կամքին գուցե հակառակ են, բայց հարկադիր կամ պարտադիր չեն համարվում: Դրանք դատապարտյալների համար աշխատանքներն են, զինվորական կամ այլընտրանքային ծառայության մեջ գտնվող քաղաքացու աշխատանքը կամ արտակարգ իրավիճակներում տրվող այս կամ այն աշխատանքն է, որը բխում է հասարակության, տվյալ համայնքի անվտանգությունից, բարեկեցությունից եւ այլն:
Կարդացեք նաև
Զարուհի Բաթոյան
ՔՊ պատգամավոր Զարուհի Բաթոյանն ասաց, որ կարեւոր է մուրացկանության մեջ ներգրավելը սահմանել որպես շահագործման տեսակ, որովհետեւ դա ԵԽ առաջարկն է եղել մեր երկրին. «Վերջին տարիներին գուցե այդքան շատ մեծ թվով չեն մուրացկանության մեջ ներգրաված երեխաների դեպքերը, բայց շահագործման այդ դեպքերն, այնուամենայնիվ, դեռևս առկա են»:
Ռուբեն Սարգսյանը պատասխանեց, որ կարող են աշխատանքային կարգով դա առանձին քննարկել ու մուրացկանությունը դիտարկել որպես հարկադրանք, պարզապես հարց է՝ դա ինչպե՞ս դիտարկել՝ աշխատող-գործատու հարաբերությունների համատեքստո՞ւմ, թե՞ ընտանեկան:
Նախագիծը դրական եզրակացություն ստացավ:
Հռիփսիմե ՋԵԲԵՋՅԱՆ
