Բրյուսելյան եռակողմ հանդիպումից երկու օր անց պաշտոնական Բաքուն վերսկսեց որդեգրած մարտավարությունը՝ հայ–ադրբեջանական սահմանին ՀՀ ԶՈւ զինծառայողների կողմից հրադադարի խախտման վերաբերյալ կեղծ հաղորդագրություններ տարածելով: Սեպտեմբերի 3-ին եւ 4-ին Ադրբեջանի պաշտպանության նախարարությունը տարածեց նման երեք ապատեղեկատվություն՝ ստիպելով ՀՀ ՊՆ–ին հանդես գալ հերթական հերքումներով: Հատկանշական է, որ մինչ բրյուսելյան հանդիպումը Բաքվից նման կեղծ հայտարարությունների տարածման դեպքերը կտրուկ նվազել էին, բայց սեպտեմբերի 4-ին օրվա ընթացքում Բաքվից արդեն երկու անգամ հրադադարի խախտման վերաբերյալ ապատեղեկատվություն տարածվեց:
Վերոնշյալ փաստերը խոսում են այն մասին, որ Ադրբեջանը շարունակում է ուժի դիրքերից խոսել հայ-ադրբեջանական հարաբերությունների կարգավորման գործընթացի շրջանակներում: Վերջինս փորձում է իմիտացնել մի իրավիճակ, երբ հայկական զինուժի կողմից հրադադարի խախտման մասին ապատեղեկատվություն տարածելով՝ իր համար թվացյալ հիմքեր է նախատեսում ՀՀ-ի վրա հարձակվելու համար: Այլ կերպ ասած, Բաքուն այս ձեւով՝ ճնշման իմիտացիայով փորձում է առաջ տանել հայ-ադրբեջանական հարաբերությունների հաստատման իրեն ձեռնտու տարբերակը՝ ակնարկելով, որ իր առաջադրած պայմանները չբավարարելու դեպքում կխախտի նաեւ հայ-ադրբեջանական ներկայիս սահմանը:
Ադրբեջանի այս մարտավարությունը հեռու է իրականությունից, քանի որ ՀՀ սահմանները բացահայտ խախտելու դեպքում գործելու է ՀԱՊԿ պայմանագրի համապատասխան դրույթը: Ինչքան էլ վերջինիս անդամ պետությունները լավ հարաբերություններ ունենան Ադրբեջանի հետ, միեւնույն է՝ պարտավոր են արձագանքել պայմանագրի անդամ երկրի վրա ցանկացած ագրեսիայի դեպքին: Դրանից բացի, Իրանը գրեթե ամենամսյա պարբերականությամբ հայտնում է, որ չի հանդուրժի իր հարեւան պետությունների սահմանների խախտումը՝ դրանով պարզ հասկացնելով, որ նման միջադեպի ժամանակ անխուսափելիորեն կմիջամտի: Մյուս կողմից էլ Ադրբեջանը լավ գիտի, որ իրավիճակն ապակայունացնելու փորձի դեպքում համարժեք պատասխան կստանա ՀՀ զինված ուժերից, ինչը պարբերաբար զգացել եւ զգում է իր մաշկի վրա յուրաքանչյուր նման արկածախնդրության փորձի դեպքով:
Պաշտոնական Բաքվի նման պահվածքը միջազգային դաշտում խաղացողների մոտ նրա հանդեպ անվստահելի գործընկերոջ տպավորություն է ձեւավորում:
Կարդացեք նաև
Արմեն ՎԱՐԴԱՆՅԱՆ
Հոդվածն ամբողջությամբ՝ «Հայաստանի Հանրապետություն» օրաթերթի այսօրվա համարում:
