Նախկին վարչապետ Հովիկ Աբրահամյանը չի ներկայացել դատախազություն: Այդ մասին լրագրողներին տեղեկացրել են ՀՀ գլխավոր դատախազության հասարակայնության հետ կապերի բաժնից:
Հիշեցնենք, որ Հովիկ Աբրահամյանն այսօր 10.00-ին հրավիրել էր գլխավոր դատախազության՝ ապօրինի ծագում ունեցող գույքի բռնագանձման գործերով վարչություն:
«Ղեկավարվելով «Ապօրինի ծագում ունեցող գույքի բռնագանձման մասին» օրենքի 16-րդ և 17-րդ հոդվածներով՝ ծանուցում եմ, որ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունում Ձեզ պատկանող գույքի առնչությամբ իրականացվում է ուսումնասիրություն, որի արդյունքում կազմվել է ամփոփագիր:Դուք իրավունք ունեք սույն ծանուցագիրը ստանալու պահից մեկ ամսվա ընթացքում ներկայանալ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն (ք.Երևան, Տիգրան Մեծ պ. 50)՝ ծանոթանալու գործի նյութերին, ներկայացնելու դիրքորոշում, ինչպես նաև հայտարարագիր՝ համաձայն ՀՀ կառավարության 2020թ. դեկտեմբերի 10-ի N 2044-Ն որոշման: Միաժամանակ, հայտնում եմ, որ ներկայանալ կարող եք 2022թ. սեպտեմբերի 5-ին՝ ժամը 10:00-ին, իսկ նշված օրը և ժամին ներկայանալու անհնարինության դեպքում հարկավոր է օրը և ժամը համաձայնեցնելու նպատակով նախապես զանգահարել 010-511-649 հեռախոսահամարին»,- ասված էր գլխավոր դատախազության հաղորդագրության մեջ:
ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն էր այսօր հրավիրվել նաեւ Էրեբունի համայնքի նախկին թաղապետ, նախկին պատգամավոր Մհեր Սեդրակյանը: Նա ներկայացել էր դատախազություն եւ ծանոթացել իրեն վերաբերվող գործի նյութերին: Մինչ այդ, սակայն, որպես հայցի նախնական ապահովման միջոց, դատախազության ներկայացրած միջնորդության հիման վրա, դատարանը կիրառել է կալանք Սեդրակյանի գույքի նկատմամբ։
Կարդացեք նաև
Նելլի ԳՐԻԳՈՐՅԱՆ
