«Լաչինի միջանցքը ձեզ համար ամբողջությամբ փակ է, առանձին, նոր ճանապարհ են բացել». արդեն մի քանի օր է` այսպիսի «աչքալուսանքով» են ռուս խաղաղապահները դիմավորում Հայաստանից Արցախ մեկնող հայկական մեքենաների ուղեւորներին եւ տեղեկացնում են, որ ճանապարհի հետագա ընթացքն արդեն հաջորդ հենակետերում ցույց կտան:
Հիշեցնենք, որ Լաչինի միջանցքն այս տարվա օգոստոսի 30-ից փակ է հայկական կողմերի համար: Արդյունքում, հայկական ևս երեք բնակավայր՝ Բերձոր քաղաքը, Աղավնո եւ Սուս գյուղերը նույնպես հանձնվեցին Ադրբեջանին:
Հայաստան-Արցախ երթուղին կկազմակերպվի ժամանակավոր ճանապարհով, որն անցնում է Շուշիի շրջանի Բերդաձորի ենթաշրջանի գյուղերով՝ շրջանցելով, Բերձորն ու Աղավնոն:
Կարդացեք նաև
Սա ժամանակավոր լուծում է, մինչեւ կավարտվի հիմնական ճանապարհի շինարարությունը, որի Արցախով անցնող հատվածի շինարարությունն Ադրբեջանն ավարտել է դեռ հուլիսին: Հայկական կողմը իր կառուցելիք ճանապարհի շինարարությունն օգոստոսի սկզբին է սկսել եւ նախատեսում է ավարտել եկող տարի գարնանը: Ինչպես ժամանակավոր, այնպես էլ հիմնական ճանապարհը կվերահսկեն ռուս խաղաղապահները: Ժամանակավոր ճանապարհի 4,7 կիլոմետրանոց հատվածում արդեն 8-9 հենակետ է տեղադրված: Արցախը Հայաստանին կապող նոր երթուղու ժամանակավոր հատվածն ամբողջությամբ ասֆալտապատված է։
Օգոստոսի 29-ին Արցախի ներքին գործերի նախարարությունը հայտնել էր, որ օգոստոսի 30-ին ժամը 20:00-ից Հայաստանի Հանրապետության հետ կապը կիրականացվի նոր երթուղով` Բերդաձորի ենթաշրջանի Հին շեն-Մեծ շեն գյուղերի տարածքով։ ՆԳՆ-ի հաղորդագրությանը նախորդել էր Արցախի Հանրապետության անվտանգության խորհրդի նիստը, որի ժամանակ էլ կայացվել էր ժամանակավոր ճանապարհը օգոստոսի 30-ից շահագործելու որոշումը, թեեւ նախապես հայտարարվել էր, որ նոր ճանապարհի շահագործումը սեպտեմբերի 1-ից է լինելու:
Ճանապարհի տարածքում դեռ շինարարական ակտիվ աշխատանքներ են ընթանում. դրանք իրականացնում է ադրբեջանական կողմը՝ ռուս խաղաղապահների հսկողությամբ: Կառուցվում է նաեւ Սուս եւ Աղավնո գյուղերն իրար կապող ճանապարհը: Հայկական եւ ադրբեջանական մեքենաների համար ճանապարհը համատեղ շահագործելի է, որոշ հատվածներում, խաղաղապահները կարգավորում են մեքենաների շարժը: Մի հատվածում հատուկ կամրջակ է կառուցվել, որպեսզի հայկական եւ ադրբեջանական մեքենաների ճանապարհները չխաչվեն:
Հայկական Աղավնոն այլեւս շրջանցելով
Դեպի Ստեփանակերտ նոր ճանապարհի հայկական հատվածը
Նոր ճանապարհի շինարարական աշխատանքները շարունակվում են
Նոր ճանապարհի ադրբեջանական հատվածը
Լքված բնակատեղի
Նոր Շեն գյուղը
Ադրբեջանին հանձնված հայկական տարածքներում ակտիվ շինարարական աշխատանքներ են ընթանում՝ տես լուսանկարներում։
Նելլի ԳՐԻԳՈՐՅԱՆ
Երեւան-Ստեփանակերտ
