ՀՀ ԱԺ «Հայաստան» դաշինքի պատգամավոր Գեղամ Նազարյանը «Հայելի» ակումբում խոսելով գեներալ-լեյտենանտ Միքայել Արզումանյանին 2020 թվականի հոկտեմբերի 30-ից նոյեմբերի 9-ը ընկած ժամանակահատվածում Շուշիի եւ հարակից շրջանների պաշտպանության կազմակերպման ընթացքում թույլ տրված անփութության պատճառով ձերբակալելու մասին՝ ասաց. «Երբ 2020 թվականի նոյեմբերի 9-ից հետո չհետեւեց Նիկոլի հրաժարականը, չհետեւեց նրա կալանավորումը, Հայաստանը մտավ մի փուլ, որը կարելի է անվանել չգոյության փուլ:
Որովհետեւ ինչ տեղի է ունենում, սա ֆանտաստիկ կինոյի ժանրից է, որ չպետք է լիներ: Այսինքն, 2020 թվականի նոյեմբերի 9-ից հետո Հայաստանը Նիկոլը չպետք է ղեկավարեր: Դա հակատիեզերական է, հակաքաղաքագիտական է, չի բխում մեր պետության շահերից, ոնց ուզում եք նայեք: Իհարկե, եթե հանրությունը թույլ լինի, եթե քաղաքական էլիտան թույլ լինի եւ առաջնորդվի նեղ անձնական, նեղ թիմային շահերով, բնականաբար, Նիկոլը պետք է գտնի պատասխանատուներ եւ մեղավորներ, այդ թվում՝ Շուշիի խայտառակ հանձնման, ես կասեի՝ նվիրաբերման:
Այն ինֆորմացիան, որ ես ձեռք եմ բերել, երբ ստեղծեցի «Ճշմարտություն սերունդների համար» նախաձեռնությունը, դրանցից շատերը դիտավորյալ չեմ բարձրաձայնում, որովհետեւ, նախ այս պահին անիմաստ է բարձրաձայնելը, որովհետեւ դրանով ես երկրին ոչ մի օգուտ չեմ տա, բայց մեծագույն ցավ կպատճառեմ այն նահատակ տղաների ծնողներին, որոնք կլսեն ինձ:
Ես կարճ ասեմ. Շուշիի հանձնման, նվիրաբերման միակ մեղավորն ու պատասխանատուն հենց Նիկոլն է: Այդ մասին ինքը եւս շատ լավ գիտի: Իհարկե, երբ ասում եմ միակը, դա չի նշանակում, թե ինքը խմբակիցներ, թիմակիցներ չի ունեցել: Իհարկե, ունեցել է գործիքներ, որոնց միջոցով նա դա իրականացրել է: Բայց իմ համար էականն այն է, որ նա իր ՖԲ էջում նոյեմբերի 9-ին գրում էր. «Շուշիի համար մարտերը շարունակվում են»: Այդ ամենը իմ մոտ արձանագրված կա:
Կարդացեք նաև
Ես ուզում եմ հիշեցնել Ազգային Ժողովում, երբ մենք բոյկոտում էինք նիստերը, այդ ժամանակ ինքը գտնվելով ցնցակաթվածային վիճակում, կամ ինչ-ինչ խնդիրեր լուծելու համար դիտավորությամբ, ասաց մի բան, որը հերիք էր նրան ձերբակալելու եւ կալանավորելու համար: Նա հայտարարեց. «Մի՞թե չեք հասկանում, որ պատերազմը Շուշիի համար էր»: Դա շատ ավելի խորը նշանակություն ունի, քան մարդիկ հուզական ասում են՝ տեսեք ինչ ասաց: Դա շատ ավելի ծանր հայտարարություն էր, քան այն, թե մենք կարող էինք ստանալ նույն վիճակը, բայց առանց զոհերի»:
Գեղամ Նազարյանը հիշեցրեց, որ ապրիլի 26-ին ինքն է առաջինը նախաձեռնել Նիկոլ Փաշինյանին ձերբակալելու եւ կալանավորելու գործընթացը, որին մասնակցել են հարյուրավոր զոհվածների ծնողներ:
Աշոտ ՀԱԿՈԲՅԱՆ
