«Շուշիի մարտական գործողությունները տեսնում եմ 44-օրյա պատերազմում պաշտպանողական օպերացիայի ընթացքում տարբեր մարտական գործողությունների համատեքստում: Որովհետեւ Շուշիի օպերացիան հենց այնպես չծնվեց, Շուշիի անկումը հենց այնպես չծնվեց: Շուշիի անկման ճանապարհը տարբեր օղակների՝ Հորադիզ, Ֆիզուլի, Ջրական, Հադրութ, Կարմիր շուկայի ենթաշրջան եւ Ասկերանի վերին ենթաշրջանի մարտական գործողությունների համատեքստում է: Ադրբեջանցին հենց այնպես չհայտնվեց Շուշիում: Այդ առումով ընդհանուր պատասխանատվության խնդիր կա Հայաստանի հանրապետությունում: ՀՀ իշխանությունները փորձում են պատասխանատվությունը գցել մարտավարական ցածր օղակի , նաեւ զինվորական հրամանատարների վրա: Եթե Միքայել Արզումանյանին պատշաճ ծանուցեին, ինքը հանգիստ կգար, բայց չէ, իրենք որոշել են թատերականացված մասկի շոուի շրջանակներում իրականացնեն»,- Aravot.am-ին ասաց ՊՆ նախկին նախարար Սեյրան Օհանյանը՝ անդրադառնալով օգոստոսի 30-ին ՊԲ նախկին հրամանատար Միքայել Արզումանյանին բերման ենթարկելու դեպքին:
Սեյրան Օհանյան
Սեյրան Օհանյանի դիտարկմամբ. «Մեր հասարակությանը շեղելու, մոլորեցնելու եւ իրենց կառուցողական ընկերներին, որոնց հետ այսօր Նիկոլ Փաշինյանը Բրյուսելում հանդիպում է, հաշվետու լինելու շրջանակներում է արվում: Որովհետեւ Միքայել Արզումանյանը, որի հետ առնչվել եմ իմ ամբողջ ծառայության ընթացքում ու Արցախյան 1-ին ազատամարտում, բոլոր հրամանատարական պաշտոններում իրեն ցուցաբերել է որպես հմուտ հրամանատար, քաջարի հրամանատար: Ինքը հայտնվել է ՊԲ ղեկավարման պաշտոնին, ղեկավարել է վերջին ժամանակահատվածում, ղեկավարել է 10-12 օր, երբ կարելի էր ասել, բանը բանից անցած է եղել:
Ինձ համար կարեւոր են հետեւյալ հարցերի պատասխանները. ով է պատասխանատու նրա համար, որ տապալեց Արցախի վերաբերյալ բանակցային ամբողջ գործընթացը, քայքայեց բանակցային ամբողջ ներուժը, ամպագոռգոռ բառերով ասաց՝ Արցախը Հայաստան է, եւ վե՛րջ եւ այսօր ձեռքերը լվացել է Արցախից ու ասում է՝ Արցախը Ադրբեջան է, եւ վե՛րջ:
Ով է այն պատասխանատուն, որը 2020 թվականի հուլիսյան գործողությունների ժամանակ հրահրեց պատերազմ։
Կարդացեք նաև
Ով է այն պատասխանատուն, որը երկիրը ներքաշեց պատերազմական գործողությունների մեջ, պատերազմի սկզբնական ժամանակահատվածում միջոցառումներ չիրականացրեց պատրաստվելու պատերազմի նախնական փուլին:
Ով է այն պատասխանատուն, որը երկիրը պատերազմի ընթացքում չի տեղափոխել ռազմական ռելսերի վրա եւ ամբողջ ներուժը չի ուղղել բանակին թիկունք կանգնելու համար:
Ով է այն պատասխանատուն, որը չի մոբիլիզացրել մարդկային ռեսուրսները բանակի սանիտարական եւ այլ կորուստները վերականգնելու ու համալրելու համար:
Ով է այն պատասխանատուն, որը պետք է ճիշտ կռահեր ու որոշեր Անվտանգության խորհրդում , կառավարությունում հակառակորդի գլխավոր հարվածի ուղղությունը, պետական ու ՏԻՄ ամբողջ ներուժը՝շինարարական ու ինժեներական բոլոր կարողությունները ուղղեր հակառակորդին կանգնեցնելու, խորքում պաշտպանություն ձեւավորելու համար:
Որոնք են այն իրավական բոլոր ոլորտները, մարմինները, որոնք անկախ ու անաչառ են, որոնք մատը մատին չեն խփել պատերազմում այդ անօրինականությունները, մարտական գործողությունների թատերաբեմում այդ բարդակը կանգնեցնելու, կարգ ու կանոն հաստատելու համար:
Ովքեր են այն պատասխանատուները, որոնք այդ անհաջողությունները, նահանջը այդ բարդակը տեսնելով՝ ընդհակառակը խրախուսել են գեներալական կոչումներով, հերոսների կոչումներ շնորհելով տարբեր շքանշաններով:
Ովքեր են այն պատասխանատուները, որոնք պատերազմը կանգնեցնելուց հետո ոչինչ չեն արել եւ բարդակը շարունակվել է ՀՀ սահմաններում, չեն կարողացել որոշել այն ռազմավարական կարեւոր կետերը, բարձունքները, ոչինչ չեն արել, որ արագ զբաղեցնեն աշխարհագրական դիրքերը, որ հակառակորդը չգա, մխրճվի այդ ամենի մեջ:
Ովքեր են այն պատասխանատուները, որոնք այսօր որոշումներ են ընդունում՝ իրականությունից կտրված, անվտանգության մասին չմտածելով:
Մեկ տարի է՝ մենք տարբեր միջոցառումներ ենք նախաձեռնում անվտանգությանը, արտաքին քաղաքականությանը, Արցախին վերաբերող, հայ-ադրբեջանական, հայ-թուրքական հարաբերություններին վերաբերող, բայց այսօրվա իշխանությունները ու ԱԺ քաղաքական մեծամասնությունը տապալում են:
Ովքեր են այն պատասխանատուները, որ այս ամենի հետ մեկտեղ երկիրը տանում են կեղծ խաղաղության օրակարգի, որոշում են ջարդել մեր պայքարի ոգին, կեղծ թուրք-ադրբեջանական խորամանկության տակ են տանում:
Այս ամենի պատասխանատուն ինձ համար, մեր ժողովրդի համար ՀՀ այսօրվա իշխանություններն են, Նիկոլ Փաշինյանի գլխավորությամբ: Ուզի Նիկոլը, թե չուզի՝ այս ամենի պատասխանատուն ինքն է ու ինքը պատասխան է տալու: Մնացածը տարբեր օղակների ու Արզումանյանի ձերբակալումը, այսպիսի բեմականացված հաղորդագրությունները իրենց կառուցողական ընկերների, Ալիեւի մոտ հաշվետվության շրջանակներում են»
Արփինե ՍԻՄՈՆՅԱՆ
Հ․ Գ․ Պաշտպանության բանակի նախկին հրամանատար, Արցախի պաշտպանության նախկին նախարար, Արցախի նախագահի գլխավոր խորհրդական Միքայել Արզումանյանի ձերբակալման ժամկետը լրացել է, և նա ազատ է արձակվել։ Արզումանյանին կալանավորելու միջնորդություն է ներկայացվել դատարան։ Աջափնյակի նստավայրում այսօր երեկոյան քննվելու է նրա խափանման միջոցի հարցը։
