«Փաստինֆո». Ադրբեջանի ԱԳՆ-ն հայտարարել է, թե Էնթոնի Բլինկենի հայտարարությունը ցույց է տալիս «տարածաշրջանում տիրող հետկոնֆլիկտային իրողություններից հեռու մոտեցում, ինչը զարմանալի է».
«Մինսկի խմբի վերաբերյալ Ադրբեջանի դիրքորոշումը բազմիցս հստակ արտահայտվել է ամենաբարձր մակարդակով։ Գործնականորեն չգործող Մինսկի խմբի «վերակենդանացման» փորձերը կարող են հանգեցնել նրան, որ ԱՄՆ-ը հեռանա ադրբեջանա-հայկական հարաբերությունների կարգավորման գործընթացից։ Ղարաբաղյան հակամարտությունը կարգավորվել է, և Ղարաբաղը Ադրբեջանի անբաժանելի մասն է։
Միջազգային հանրությունը, այդ թվում՝ մեր գործընկերները, պետք է հասկանան, որ ադրբեջանա-հայկական հարաբերությունների կարգավորման բանակցությունները ղարաբաղյան հիմնախնդրի հետ կապելը ոչ մի կերպ չի ծառայում կարգավորմանը»,- ասվում է Ադրբեջանի ԱԳՆ մամուլի ծառայության տարածած հայտարարության մեջ:
Հատուկ հանձնարարություններով դեսպան Էդմոն Մարուքյանը, անդրադառնալով ԵԱՀԿ Մինսկի խմբի ԱՄՆ- ի համանախագահ դեսպան Ֆիլիպ Ռիքերի նշանակելուն, նշել է, թե Ադրբեջանում կարծում են, որ իրենք կարող են որոշել` ԱՄՆ-ն Մինսկի խմբի համանախագահ նշանակի, թե չնշանակի:
Կարդացեք նաև
Այս մասին Էդմոն Մարուքյանը գրառում է արել «Ֆեյսբուք»-ի իր էջում:
«Ադրբեջանում կարծում են, թե իրենք կարող են որոշել` ԱՄՆ-ն Մինսկի խմբի համանախագահ նշանակի, թե չնշանակի…
Կամ իրենք կարող են պնդել, որ Լեռնային Ղարաբաղ չկա, իսկ Ղարաբաղյան հակամարտությունը լուծված է, բայց ամբողջ միջազգային հանրությունն արտահայտի այլ կարծիք` առ այն, որ երկարատև խաղաղության համար Լեռնային Ղարաբաղի հակամարտության կարգավորումն անհրաժեշտություն է»,- գրել է Մարությանը:
Նա ընդգծել է՝ արձանագրված է, որ կա Լեռնային Ղարաբաղ և դրա շուրջ՝ հակամարտություն, «առանց որի կարգավորման շատ հեռու կլինենք խաղաղությունից»:
«Ռազմական հաջողությունը կուրացնում է, իսկ հետո անհաջողությունների հիմք դառնում»,- գրել է Մարուքյանը:
