Հաշմանդամություն և սոցիալական աջակցության կարիք ունեցող երեխաները հանգստանում են կողք կողքի: Հայաստանում առաջին ու առայժմ միակ ներառական ճամբարը կազմակերպվում է Երևանի քաղաքապետարանի և «Լիարժեք կյանք» ՀԿ համատեղ նախաձեռնությամբ:
«Անցյալ տարի հասարակական կազմակերպության հետ համագործակցությամբ ֆինանսավորվեց փորձնական ծրագիրը՝ ներառական ճամբար կազմակերպելու նպատակով: Այն հաջողեց և ստացավ մեծ արձագանք: Ծրագիրը շատ կարևոր է, քանի որ երեխաները, որոնք հնարավորություն չունեն օգտվելու հանգստյան գոտիներից, այս ծրագրով լրացնում են բացը: Իսկ այն երեխաները, որոնք ինքնուրույն կենսագործունեության խնդիր ունեն, գալիս են ուղեկցողի՝ ծնողի կամ հարազատի հետ»,-նշել է Երևանի քաղաքապետարանի աշխատակազմի երեխաների և սոցիալական պաշտպանության վարչության պետ Լուսինե Հովհաննիսյանը:
Երեք հերթափոխ է, յուրաքանչյուրը՝ մեկական շաբաթ: Ստեփանավանում կազմակերպված ճամբարային հանգստի ծրագրում ներառվել է Երևանի տարբեր վարչական շրջանների 7-16 տարեկան ավելի քան 150 երեխա ու ծնող:
Քաղաքապետարանի աջակցությամբ այս տարի ճամբարը վերանորոգվել է. կառուցվել են թեքահարթակներ, փոխվել դռներն ու պատուհանները, հարմարեցվել սանհանգույցները:
Կարդացեք նաև
Երևանի քաղաքապետ Հրաչյա Սարգսյանը քաղաքապետարանի աշխատակազմի քարտուղարի ժամանակավոր պաշտոնակատար Սեյրան Մեջլումյանի, երեխաների և սոցիալական պաշտպանության վարչության պետ Լուսինե Հովհաննիսյանի հետ այցելել է ճամբար, հանդիպել երեխաներին:
«Սոցիալական ոլորտում վերջին երկու տարիներին բավական մեծ փոփոխություններ ենք իրականացրել՝ կառուցվածքային փոփոխություններ, մասնագետների վերապատրաստում: Իսկ այս ծրագրով տարբեր խնդիրներ ունեցող երեխաների ամառային հանգիստն ենք փորձել կազմակերպել»,- ընդգծում է քաղաքապետ Հրաչյա Սարգսյանը:
«Սա մեր գործակցության ամենակարևոր ծրագիրն է: Այստեղ՝ ճամբարում, ականատես ենք լինում իրական ներառականության»,- նշում է «Լիարժեք կյանք» ՀԿ նախագահ Սուրեն Մաղաքյանը:
Շրջելով տարածքում՝ քաղաքապետը ծանոթացել է ոչ միայն ստեղծված պայմաններին, այլև ճամբարային հագեցած առօրյային. մարզաառողջարարական զանազան ծրագրեր, զարգացնող խաղեր, նկարչություն ու կավագործություն: Տեղում աշխատում են նաև ԱԻՆ մասնագետները՝ երեխաներին պատրաստում պայմանական արտակարգ իրավիճակի:
Քաղաքապետի հետ զրույցում երեխաներն անկեղծացել են՝ հեռանալ չեն ուզում: Շատերն այստեղ գտել են իրենց առաջին ընկերներին:
«Ծրագիրը, վստահ եմ, շարունակական է լինելու: Այդ նպատակով 2023թ. նախատեսում ենք համապատասխան ֆինանսական միջոցներ հատկացնել»,- շեշտում է քաղաքապետը:
Ներառական ճամբարը ոչ միայն հանգստի հնարավորություն է, այլև ներառական միջավայր ստեղծելու հնարավորություն, որտեղ մանկական հուշերը լրացվում են նոր ու վառ գույներով:
Երևանի քաղաքապետարանի երեխաների և սոցիալական պաշտպանության վարչությունը տարվա ընթացքում շարունակելու է հաշմանդամություն ունեցող և սոցիալական տարբեր խմբերում ընդգրկված երեխաների համար ծրագրերը, որոնք միտված կլինեն նրանց համար հավասար պայմաններ և հնարավորություններ ապահովելուն:
Երևանի քաղաքապետարան
