Քաղաքական գործիչ Էդգար Ղազարյանն այսօր «Հայելի» ակումբում հանրությանը բացատրեց, թե որն է օգոստոսի 23-ի եւ այդ օրը ժամը 17:00-ին հրավիրված հանրահավաքի խորհուրդը:
«Օրվա խորհուրդը: Օգոստոսի 23-ը այն օրն է, երբ 1990 թվականին հիմք է դրվել հայ ժողովրդի դարավոր երազանքների իրականացմանը՝ կերտել անկախ պետություն: Անկախության Հռչակագիրը հենց դա է: Անկախության Հռչակագիրը մի փաստաթուղթ է, որը առավել արժեքավոր է, քան սահմանադրությունը: Որովհետեւ Սահմանադրությունը իր նախաբանում հղում է կատարում Անկախության Հռչակագրին: Սահմանադրությունը կարող է փոխվել, երկրի պետական կառավարման համակարգը կարող է փոխվել, իրավունքների հարաբերակցությունը կարող է փոխվել: Բայց պետության հիմնասյունը երբեք ու երբեք փոփոխությունների ենթարկվել չի կարող: Հետեւաբար, Հռչակագիրը պարտավորեցրել է բոլոր պետական մարմիններին, որ իրենց գործունեությունը համապատասխանեցնեն Հռչակագրի դրույթներին:
Լինելով նաեւ նախկին հանրային ծառայող, բարձրաստիճան պաշտոնյա՝ պիտի արձանագրեմ, որ Հայաստանում, ցավոք սրտի, այս ողջ ժամանակահատվածում հնարավոր չէ ասել, որ երբեւէ իշխանությունների գործունեությունը ամբողջությամբ համապատասխանել է Հռչակագրի դրույթներին: Հենց մի պարզ պատճառով: Հռչակագիրն ասում է՝ Հայաստանը պետք է լինի ժողովրդավարական երկիր: Ցավոք, չի եղել միջազգային կամ ներհասարակական այնպիսի գնահատական, որ վստահ լինեինք, որ մենք ապրում ենք իսկապես ժողովրդավարական երկրում: Բայց ամբողջ խնդիրն այն է, որ իշխանությունները, որոնք եղել են ու հիմա կան, բաժանված են նախկինների եւ ներկաների: Այն մարդիկ, որոնք իրենց գործունեության մեջ շեղումներ են թույլ տվել, նախկին են: Բայց այս մեկը, որը ոչ թե շեղում է թույլ տվել, այլ կործանել է Հայոց Անկախ Պետականությունը, համարվում է ներկա:
Մենք շատ շուտ, մեկ օրում, հենց Հռչակագրի օրը նրանց պետք է դարձնենք նախկին, չնայած, որ նրանք ամենավատ նախկինն են: Ավելին, սրանց պետք է առհասարակ վռնդել մեր հանրային կյանքից: Եվ իշխանության արտոնել բացառապես այն մարդկանց, որոնց ամենօրյա գործունեությունը համապատասխանում է Հայաստանի Անկախության Հռչակագրի դրույթներին»,- ասաց Էդգար Ղազարյանը:
Կարդացեք նաև
Աշոտ ՀԱԿՈԲՅԱՆ
