ԱԻ նախարար Արմեն Փամբուխչյանն այսօր առավոտյան լրատվամիջոցների հետ ճեպազրույցում տեղեկացրեց, որ երեկ երեկոյան դադարեցված որոնողափրկարարական աշխատանքներն այսօր վերսկսվել են ժամը 8:30-ին:
«Ներկա պահին դրանք իրականացվում են ենթադրվող էպիկենտրոնային հատվածում: Այնտեղ, ըստ տեղեկությունների կա քաղաքացի, որն այդ վայրում է գտնվել պայթյունի պահին: Մենք ամբողջ ուժով տվյալ հատվածում իրականացնում ենք աշխատանքներ»:
Անդրադառնալով փլուզման վտանգ պարունակող շենքի ապամոնտաժմանը՝ նախարարն ասաց. «Մեզ համար առաջնային է՝ կատարել ինժեներային այն աշխատանքները, որոնք թույլ կտան չխոչընդոտել մեր որոնողափրկարարական աշխատանքներին, որից հետո միայն պետք է քննարկվի շինության հետագա ճակատագիրը»:
Թե ենթադրյալ քաղաքացու որոնողական աշխատանքները որքան կտեւեն, հաշվի առնելով, որ որոնողական աշխատանքների տարածքը արդեն բավականին նեղացել է, Արմեն Փամբուխչյանը դժվարացավ հստակ ժամկետ նշել․ «Այո, որոնողական աշխատանքների տարածքը նեղացել է: Բայց քանի որ ենթադրվում է, որ հենց այդտեղ է պայթյունի էպիկենտրոնը, դա իր հերթին բարդություններ է առաջացնում որոնողափրկարարական աշխատանքների մասով, քանի որ նման հարվածային ալիքից եւ նման ջերմաստիճանից, ինչպես նաեւ օրեր շարունակ տեղում առաջացած գոլորշիացումներից, շանսերը հուսադրող չեն: Բայց մենք ամեն ինչ անելու ենք, որպեսզի բացազատենք այդ հատվածը, օգտագործենք մեր փրկարար շների օգնությունը եւ մեր որոնողափրկարարական խումբը մուտք գործի տվյալ հատված»:
Նախարարը նաեւ պատասխանատու հայտարարեց, որ լրացուցիչ մարդկային ուժի, տեխնիկայի, մասնագիտական գիտելիքների որեւէ պակաս եւ որեւէ երկրից օգնություն խնդրելու կարիք չի եղել: «Մեզ տեղում օգնել են «Կարմիր խաչի» կամավորականները եւ ՈՄԱ ՀԿ կամավորականները, որոնք կատարել են հիմնական ձեռքի աշխատանքը: Իսկ «Կարմիր խաչի» աշխատակիցները ունեն որոնողափրկարարական մասնագիտացում եւ ավելի պրոֆեսիոնալ են: Մենք ունենք նաեւ կինոլոգիական ջոկատ: Բայց նաեւ կամավորական սկզբունքով օգնության են եկել եւ ծառայություններ մատուցելու ցանկություն են հայտնել արտասահմանցի գործընկերներ Ռուսաստանի Դաշնությունից եւ, եթե չեմ սխալվում, Բելգիայից կամ Ֆրանսիայից: Հենց առաջին օրը մեզ օգնության կարգով «Ռուս-հայկական մարդասիրական արագ արձագանքման կազմակերպության» մեր գործընկերներն են օգնության ձեռք մեկնել՝ ապահովելով լուսավորությունը եւ իրենց ԱԹՍ-ներով իրականացրել են հետախուզում»,-ասաց նա:
Աշոտ ՀԱԿՈԲՅԱՆ
