Համաձայն Կադաստրի կոմիտեի տվյալների՝ Արշակունյաց 15 հասցեում գործող «Սուրմալու» առևտրի կենտրոնի վարչական շենքից 2019թ․ մայիսից 116 քմ վարձակալած «Գոհար Առաքելյան Վրեժի» ԱՁ-ն 2019թ․ սեպտեմբերին Ֆինանսների նախարարությունում հաշվառվել է որպես հրագործական ապրանքների արտադրություն, ներմուծում կամ առևտուր իրականացնող կազմակերպություն: Համաձայն ՊԵԿ-ի՝ ԱՁ-ն գործող է, զբաղվում է ոչ մասնագիտացված մեծածախ առևտրով:
Aravot.am-ին հայտնի դարձավ, որ «Գոհար Առաքելյան Վրեժի» ԱՁ-ի դեմ 2021 թվականին խաղալիքների ներկրմամբ զբաղվող «Մաթթել ինք» ընկերությունը քաղաքացիական հայց էր ներկայացրել՝ պահանջելով «Գոհար Առաքելյան Վրեժի» ԱՁ-ին պարտավորեցնել դադարեցնել ապրանքային իրենց նշանի ապօրինի օգտագործումը:
«Մաթթել ինք» ընկերությունը ՀՀ-ում հանդիսանում է «UNO» ապրանքային նշանի իրավատերը, «UNO» ապրանքային նշանի պատկերն օգտագործվում է նաև թղթախաղերի վրա:
«Գոհար Առաքելյան Վրեժի» ԱՁ–ն փորձել է ներմուծել Հայաստանի Հանրապետություն «UNO» ապրանքային նշանի պատկերը կրող թղթախաղերը։ «Մաթթել ինք» ընկերությունը «Գոհար Առաքելյան Վրեժի» ԱՁ–ին թույլտվություն չի տվել օգտագործելու իր ապրանքային նշանը։
Կարդացեք նաև
Դատալեքսից տեղեկանում ենք, որ դատարանը բավարարել է «Մաթթել ինք» ընկերության հայցն ընդդեմ «Գոհար Առաքելյան Վրեժի» ԱՁ-ի` ապրանքային նշանի ապօրինի օգտագործումը դադարեցնելու պահանջի մասին: Արգելվել է «Գոհար Առաքելյան Վրեժի» ԱՁ–ին ապրանքային նշանի ապօրինի օգտագործումը, «UNO» ապրանքային նշանը կրող ապրանքների ներմուծումը Հայաստանի Հանրապետություն:
«Մաթթել ինք» ընկերության ներկայացուցիչ Արմինե Ավետիսյանը մեր զրույցում հայտնեց, որ դատական նիստերի ժամանակ պատասխանող Գոհար Առաքելյանը դատարանին հայտնել էր, որ իր ԱՁ-ն ակտիվ չի գործում, «Սուրմալու» առեւտրի կենտրոնում գտնվող իրենց տաղավարն էլ հրդեհի պատճառով վնասվել է:
Քննչական կոմիտեից մեզ հետ զրույցում դժվարացան հայտնել՝ արդյոք «Գոհար Առաքելյան Վրեժի» ԱՁ ներկայացուցիչները հարցաքննվե՞լ են, թե՞ ոչ: Միայն ասացին, որ հիսունից ավելի մարդ է հարցաքննվել, նրանց մեջ են թե՛ տուժողներ, թե՛ տնտեսվարողներ: Այսօրվա դրությամբ՝ «Սուրմալու» առեւտրի կենտրոնի սեփականատերը դեռ չի հարցաքննվել:
Արփինե ՍԻՄՈՆՅԱՆ
