Հանրային կառավարման և քաղաքականության փորձագետ, տնտեսագետ Հովհաննես Ավետիսյանի ֆեյսբուքյան գրառումը
Քանի որ շատերը ակամայից` չգիտակցված, մասնակից են դառնում համապատասխան պետական մարմնի պատասխանատվությունից խուսափելուն, հարկ եմ համարում այստեղ մեջբերում անել Հայաստանի Հանրապետության քաղաքաշինության, տեխնիկական և հրդեհային անվտանգության տեսչական մարմնի (կարճ՝ տեսչական մարմին) կանոնադրությունից հետևյալ հատվածը.
Գլուխ III. ՏԵՍՉԱԿԱՆ ՄԱՐՄՆԻ ԼԻԱԶՈՐՈՒԹՅՈՒՆՆԵՐԸ
- Տեսչական մարմնի լիազորություններն են.
1) հրդեհային և տեխնիկական անվտանգության ապահովման բնագավառում`
Կարդացեք նաև
…
…
թ. կազմակերպությունների, արտադրական տեղամասերի, առանձին ագրեգատների աշխատանքի, շենքերի, շինությունների շինարարության, վերակառուցման, վերականգնման, ուժեղացման, արդիականացման աշխատանքները, ինչպես նաև շենքերի և շինությունների շահագործման ամբողջովին կամ մասնակի դադարեցումը` հրդեհային անվտանգության նորմատիվ փաստաթղթերի պահանջների այն խախտումների դեպքում, որոնք անմիջականորեն և ուղղակի սպառնալիք են ստեղծում հրդեհների առաջացման և (կամ) մարդկանց անվտանգության համար.
…
…
Այսինքն, այս տեսչական մարմնի կանոնադրությունը հստակ ասում է, որ լիազորված են իրականացնել. «շենքերի և շինությունների շահագործման ամբողջովին կամ մասնակի դադարեցում` հրդեհային անվտանգության նորմատիվ փաստաթղթերի պահանջների այն խախտումների դեպքում, որոնք անմիջականորեն և ուղղակի սպառնալիք են ստեղծում հրդեհների առաջացման և (կամ) մարդկանց անվտանգության համար»:
Փաստացի, սույն տեսչական մարմնի կողմից արձանագրվել են էական խախտումներ, և տնտեսավարողի գործունեության դադար չի եղել, որի լիազորությունը ունեին և պարտավոր էին անել: Հետևաբար, թիվ մեկ պատասխանատուն հենց այս տեսչական մարմինն է, հետո նոր տնտեսավարողը:
Հ.Գ. Ահաբեկչության վարկածի ջատագովները չեն էլ պատկերացնում, թե ինչպիսի մեծ արջի ծառայություն են մատուցում փնթի պաշտոնյաներին՝ խուսափելու պատասխանատվությունից:
Պետք է հասկանալ, որ փնթի պետական կառավարումը ահաբեկչությունից ավելի ծանր հետևանքների է բերում. ինքնին, փնթի կառավարումն է, որ կարող է ահաբեկչությանը ծնունդ տալ:
Ոնց հասկանում եմ, մենք դասեր չենք քաղել պարտված պատերազմից, ինչի գլխավոր, եթե ոչ միակ պատճառը, փնթի կառավարումն էր, եթե ոչ` միտումնավոր չկառավարումը:
