Այսօր ժամը 12․06-ից սկսած լարված իրավիճակ էր ստեղծվել Գյումրու հարկային տեսչության շենքում ու դրա մոտակայքում։ Քաղաքացին զանգահարել էր 911 ծառայություն՝ հայտնելով, որ կպայթեցնի Գյումրիի հարկայինի շենքը:
Սակրավորները 3-4 ժամ շարունակ որոնողական աշխատանքներ էին իրականացնում՝ տարհանելով հարկայինի աշխատակիցներին ու փնտրելով պայթուցիկ նյութ։ Ոստիկանները քիչ առաջ պարզեցին, որ ահազանգը կեղծ է, հեղինակը 63-ամյա գյումրեցի է, որ եղել էր ալկոհոլի ազդեցության տակ։ Ըստ ոստիկանների, նա դեռ ամբողջապես սթափ վիճակում չէ։ Նա նշել է, որ ալկոհոլի ազդեցության տակ չի հասկացել՝ ինչ է անում։
Սակայն այդ նույն քաղաքացին շենքեր պայթեցնելու մասին իր ահազանգերը սկսել էր երեկվանից։
Ըստ ոստիկանության պաշտոնական հաղորդագրության, երեկ հարկայինի շենքը պայթեցնելու մասին ահազանգից բացի, նա զանգահարել էր ոստիկանության օպերատիվ կառավարման կենտրոն ու հայտնել, որ պատրաստվում է պայթեցնել Ազգային ժողովի շենքը։
Կարդացեք նաև
Այսօր ոստիկանները հարց են ուղղել նրան, թե Ազգային ժողովի շենքն ինչո՞ւ էիր ուզում պայթեցնել, դա ի՞նչ կապ ունի Գյումրիի հետ, եւ նա պատասխանել է․ «Զանգեցի ոստիկանություն, հետո ջոկեցի, որ Ազգային ժողովի շենքը Երևանում է»։
Նունե ԱՐԵՎՇԱՏՅԱՆ
