Հայկական Կարմիր խաչի ընկերության (ՀԿԽԸ) Աղետներին արձագանքման, Առաջին օգնության և հոգեբանների թիմերը՝ ՀԿԽԸ գործադիր տնօրեն Աննա Եղիազարյանի գլխավորությամբ, օգոստոսի 14-ին Սուրմալու» տոնավաճառի տարածքում տեղի ունեցած պայթյունից և բռնկված հրդեհից անմիջապես հետո ժամանել են դեպքի վայր՝ աջակցելու որոնողափրկարարական և քարամաքրման աշխատանքներին, ըստ անհրաժեշտության ցուցաբերելու առաջին օգնություն և առաջին հոգեբանական օգնություն, տրամադրելու ջուր և սնունդ՝ իրականացնելու կառավարությանն աջակցող դերը մարդասիրական ոլորտում:
Օգոստոսի 14-ի լույս 15-ի գիշերը ՀԿԽԸ Տավուշի մարզային մասնաճյուղի Աղետներին արձագանքման թիմը՝ ժամանելով Իջևանից, համալրեց դեպքի վայրում աշխատող ՀԿԽԸ թիմի կազմը:
Օգոստոսի 15-ին ժամը 11:00-ին նրանց շարքերը համալրեց նաև ՀԿԽԸ Վայոց ձորի մարզային մասնաճյուղի Աղետներին արձագանքման թիմը:
Կարդացեք նաև
Ընդհանուր առմամբ արձագանքման աշխատանքներում ներգրավված է ՀԿԽԸ 100-ից ավելի աշխատակից և կամավոր, այդ թվում՝ անձնակազմի 10 անդամ, արագ արձագանքման թիմի կամավոր 36 անդամ, 20 առաջին օգնող, 6 հոգեբան և 30 աջակցող կամավոր:
Արձագանքի 21 ժամերի ընթացքում առաջին օգնություն է ցուցաբերվել ավելի քան 90 անձի, որոնք ունեցել են վերջույթների վնասվածքներ, ծխահարություն, հոգեբանական աջակցություն է տրամադրվել ավելի քան 120 անձի՝ տուժածների հարազատներին, ընկերներին, քաղաքացիներին և փրկարարական աշխատանքներին մասնակցող կամավորներին:
Արագ արձագանքման ծառայությունների, ոստիկանության աշխատակիցներին, տարածքում գտնվող քաղաքացիներին տրամադրվել է ջուր (ավելի քան 500 շիշ), չոր սնունդ (ավելի քան 250 անձի) և դիմակներ` հորդորելով կրել և պահպանել անվտանգության կանոնները (1000 անձի):
Հայկական Կարմիր խաչի ընկերությունը շարունակում է իրականացնել իր մարդասիրական առաքելությունը՝ աջակցելով տոնավաճառի պայթյունի արձագանքին և այս ծանր պահին գտնվում է մեր քաղաքացիների կողքին:
Հայկական Կարմիր խաչի ընկերությունը (ՀԿԽԸ), լինելով Կարմիր խաչի և Կարմիր մահիկի միջազգային շարժման լիիրավ անդամ, առաջնորդվում է Շարժման հիմնարար սկզբունքներով` Մարդասիրություն, Անկողմնակալություն, Չեզոքություն, Անկախություն, Կամավորություն, Եզակիություն, Համընդհանրություն։
Հանդիսանալով կառավարությանն աջակցող կառույց՝ մարդասիրական ոլորտում, ՀԿԽԸ-ն արդեն 102 տարի է գործունեություն է ծավալում հանրապետության ամբողջ տարածքում հետևյալ ռազմավարական ուղղություններով՝ աղետների կառավարում, բնակչության տեղաշարժ, սոցիալ – առողջապահություն, առաջին օգնություն, երիտասարդական, մարդասիրական արժեքների տարածում և այլն:
ՀԿԽԸ առաքելությունն է նվազեցնել բնակչության խոցելիությունը` մարդասիրության ուժի մոբիլիզացմամբ, նախապատրաստվել դիմակայելու այն իրավիճակներին, որոնք կարող են բնակչության խոցելիության պատճառ դառնալ, ցուցաբերել անհրաժեշտ օգնություն` սատարելով սոցիալ-տնտեսական ծանր պայմաններում գտնվող մարդկանց:
Հայկական Կարմիր Խաչի ընկերություն
