«Իրավական ուղի» ՀԿ նախագահ Ռուբեն Մելիքյանի ֆեյսբուքյան գրառումը
«Երազ» այգում «տժժացող» մարդիկ ոչ մի օրենք չեն խախտել, բայց կոպիտ կերպով խախտել են ՀԱՆՐԱՅԻՆ ԲԱՐՈՅԱԿԱՆՈՒԹՅՈՒՆԸ:
Երբ սգո օր հայտարարվի, ու ՕՐԵՆՔԻ ՈՒԺՈՎ արգելվեն հանրային վայրերում զվարճանքի բոլոր միջոցառումները, ապա նման արարք կատարողներն արդյո՞ք գործած կլինեն ավելի մեծ մեղք, քան ԱՅՍՕՐ «Երազում» տժժացողները։ Վստահ եմ՝ ո՛չ։ Նույն ծանրության մեղք կլինի։ Ավելին, այսօրվա մեղքը նույնիսկ ավելի ծանր է, որովհետև դեռ մարդիկ կան փլատակների տակ։
Ինչո՞ւ է այդպես: Որովհետև «չգրված օրենքները» (նույնն է թե՝ հանրային բարոյականությունը) գրված օրենքներից ավելի ցածր չեն։ Դրանք, պատկերավոր ասած, «պաշտոնական օրենքների» պատվանդանն են։
Կարդացեք նաև
Հանրային բարոյականության կենսագործումը կատարվում է ԱՄՈԹԱՆՔԻ միջոցով, և այն ռուս աղջիկն ընդամենը դա էր կատարում։ Ճիշտ էր անում։ Սխալն այն է, որ ամոթանք տվողը մեզանից մեկը չէ՛ր։
Արդյոք մենք կորցրե՞լ ենք մեր «չգրված օրենքների», մեր հանրային բարոյականության պահապանը լինելու ունակությունը։ Հուսով եմ՝ ոչ։ Հուսով եմ՝ դեռ ունենք սթափվելու ու մեր արհավիրքների հիմքը՝ բարոյականության ճգնաժամը հաղթահարելու շանս։
