AMAA-ի գործադիր տնօրեն Զավեն Խանջյանը հայտարարեց Արեն Դեյիրմենջյանին Հայաստանում AMAA-ի նոր ներկայացուցիչ նշանակելու մասին, որն ուժի մեջ կմտնի 2022 թ. սեպտեմբերի 1-ից:
Արեն Դեյիրմենջյանը երեք տարի առաջ տեղափոխվեց իր ծննդավայր Բեյրութից՝ միանալու Բաղրամյան պողոտայի վրա գտնվող Երեւանի գլխամասային գրասենյակին՝ որպես Հայաստանում AMAA-ի ներկայացուցչի տեղակալ:
Արենի՝ հավատքով անցած անձնական ուղին, ինչպես ինքն է ասում, նրան տարավ «արթնության ճանապարհով», ինչը մղեց Արենին՝ թողնել իր տան հարմարավետությունը եւ ուղեւորվել դեպի անհայտություն՝ ճշմարիտ իմաստ եւ նպատակ գտնելու համար:
2013 թ. Բեյրութի Ամերիկյան համալսարանն ավարտելուց հետո ստանալով լանդշաֆտային ճարտարապետության բակալավրի աստիճան՝ Արենը միացավ Լիբանանում իր ընտանիքի արտադրական բիզնեսին: Նա խորապես ներգրավված է եղել նաեւ Աշրաֆիեի Հայ Ավետարանական եկեղեցում՝ որպես երիտասարդական խմբի գլխավոր առաջնորդ եւ քրիստոնեական «Ջանից» ընկերակցության անդամ: 2016 թ. նա շարունակեց ուսումը Մոնտրյոյում (Շվեյցարիա), որն ավարտեց 2018 թ.՝ ստանալով մագիստրոսի աստիճան:
Մեկ տարի անց, երբ իրեն առաջարկվեց AMAA-ի Հայաստանի ներկայացուցչի տեղակալի պաշտոնը, Արենը մտածեց, որ ճիշտ ժամանակն է ընտանիքին պատկանող արտադրական ընկերությունից դուրս գալ եւ իր ղեկավարման փորձառությունն ու հոգեւոր աճը ծառայեցնել բարեգործական եւ քրիստոնեական առաքելության իրագործմանը։
Որպես Հայաստանում AMAA-ի ներկայացուցչի տեղակալ՝ Արենի ամենօրյա պարտականությունների մի մասը ներառում էր շինարարական նախագծերի վերահսկումը, ֆինանսական թիմի հետ կապը, բյուջեի եւ դրամաշնորհային առաջարկների պատրաստումը:
Արենը նաեւ պարբերաբար այցելում էր AMAA-ի տարբեր գրասենյակներ Հայաստանում եւ Արցախում՝ ավելին իմանալու յուրաքանչյուր տարածաշրջանի համայնքների կարիքների մասին: Նա սերտորեն համագործակցել է AMAA-ի Հայաստանի ներկայացուցիչ Հարութ Ներսեսսյանի հետ՝ ռազմավարությունները նախանշելու, ինչպես նաեւ շահագրգիռ կողմերի հետ ընթացիկ եւ նախկին ծրագրերը գնահատելու համար:
Արենը երաժիշտ է, ստացել է դասական եւ ջազ դաշնամուրի գիտական աստիճան եւ նվագել է «Նոր երգ» քրիստոնեական նվագախմբում։ Ազատ ժամանակն անցկացնում է՝ դաշնամուր նվագելով, վայելելով Հայաստանի հարուստ երաժշտական աշխարհը, ճամփորդելով, մարզվելով, ընթերցելով եւ համտեսելով տարատեսակ խոհանոցների ուտեստներ:
Նրա ծառայության մղիչ ուժը մնում է հնազանդությամբ ջանալ՝ իրագործելու այն, ինչ Աստված դրել է իր առջեւ:
«Ես խանդավառ եմ Արեն Դեյիրմենջյանի՝ Հայաստանում AMAA-ի ներկայացուցիչ նշանակմամբ: Արենը նվիրվածություն է ցուցաբերել եւ մեծ եռանդով աշխատել է՝ Հայաստանում AMAA-ի առաքելության առաջխաղացման համար». նշում է AMAA-ի գործադիր տնօրեն Զավեն Խանջյանը: «Մենք համոզված ենք, որ նրա ղեկավարման փորձը եւ հոգեւոր հասունությունը կնպաստեն AMAA-ի գործունեության առաջխաղացմանը Հայաստանում եւ Արցախում»:
ՄԱՄՈՒԼԻ ՀԱՂՈՐԴԱԳՐՈՒԹՅՈՒՆ
