Օգոստոսի 11-ին լրացավ հայ անվանի քանդակագործ, արվեստի վաստակավոր գործիչ, պրոֆեսոր Թերեզա Միրզոյանի 100 ամյակը։
Այս կարևոր օրը «Հայուհիների համահայկական միություն» ՀԿ և արվեստագետի դուստր՝ նկարիչ, նկարիչների միության անդամ, ՀՆՄ վարչության անդամ Անուշ Առաքելյանի, ընտանիքի անդամների համատեղ ջանքերով կյանքի կոչվեց ինքնատիպ մի նախաձեռնություն, որի շնորհիվ հիշատակվեց մեծ հայուհու անունը:
Ծննդյան օրը մեկնարկեց 100 փաստ 100-ամյակի առթիվ ֆեյսբուքյան արշավով, որի ընթացքում հրապարակվեցին ուշագրավ փաստեր, որոնք ներկայացնում էին մեծ արվեստագետի կյանքի ու գործունեության երևելի դրվագները` հակիրճ, բայց հարուստ և բազմակողմանի տեղեկություն փոխանցելով Թերեզա Միրզոյան կին-արվեստագետի, մանկավարժի և անվանի քանդակագործի մասին, որոնց մասին շատերը տեղեկացան առաջին անգամ:
Կարդացեք նաև
Հոբելյանական օրվա ամփոփիչ ակորդները տրվեցին մայրաքաղաքի սրտում՝ Աբովյան փողոցում տեղակայված «Սիրում է, չի սիրում» գողտրիկ արձանի շուրջ կազմակերպված միջոցառման ժամանակ, որտեղ արվեստի երկրպագուները, ընտանիքի անդամները, հոբելյարին աշակերտած արվեստագետները, բարեկամները և մի խումբ հայուհիներ ոգեկոչեցին նվիրյալ հայուհու վառ հիշատակը:
Ներկաները դիտեցին արխիվային դրվագներ հեղինակի լուսանկարներով, վերհիշեցին քանդակի վերականգնման և տեղադրման պատմությունը, անցորդներին հրավիրեցին մասնակցելու «Սիրում է, չի սիրում» երիցուկախաղին՝ հասկանալու սիրված են արդյո՞ք, թե՞ ոչ` քանդակի նրբիրան հերոսուհու օրինակով:
Թերեզա Միրզոյանի 100 ամյակը իր հեղինակած «Սիրում է, չի սիրում» քանդակի մոտ նշելը խորհրդանշական էր. կանացիության և նրբության մարմնավորող քանդակը ժամանակին երկրորդ կյանք է ստացել. 1991 թվականին կատարված վայրագության հետևանքով կոտրվելուց և գողացվելուց հետո 2012 թվականին վերականգնվել է դստեր՝ Անուշ Առաքելյանի և Գետիկ Բաղդասարյանի շնորհիվ: Քանդակը խորհրդանշում է յուրօրինակ վերածնունդ՝ դառնալով ունեցած արժեքները փրկելու և պահպանելու օրինակ:
Անցորդների անկեղծ հիացմունքը, սպիտակաթյուր երիցուկները, դրական, եթերային էմոցիաները ջերմությամբ էին լցրել մայրաքաղաքի գողտրիկ անկյունը:
Թերեզա Միրզոյանը իր ժամանակին, նաև այսօր ընկալվում է մոնումենտալ քանդակագործության մեջ կարծրատիպեր կոտրող անհատականություն, որի արվեստում գերակշռում են սիրո, մայրության և գարնան թեմաները:
Հայուհիների համահայկական միություն
