Անձի առևանգման փաստով այսօր ձերբակալված ՀՅԴ Գերագույն մարմնի անդամ, ԱԺ նախկին պատգամավոր Սուրեն Մանուկյանի փաստաբան Սերգեյ Ոսկանյանը Aravot.am –ի հետ զրույցում նշեց, որ նրա ձերբակալումը համարում է ապօրինի և ոչ իրավաչափ։
«Այս պահին Սուրեն Մանուկյանը ձերբակալված է։ Քանի որ իմ պաշտպանյալը չի կատարել իրեն վերագրվող մեղադրանքը, նրա ձերբակալումը համարում եմ ապօրինի և ոչ իրավաչափ։ Ձերբակալման վճիռը բողոքարկելու ենք 24 ժամվա ընթացքում։ Այլ մանրամասներ չեմ կարող հաղորդել, քանի որ նախաքննական գաղտնիք է»,-հավելեց Ոսկանյանը։
Փաստաբանը նաև փոխանցեց Մանուկյանի խոսքերը, որը կասկածանքները համարում է շինծու։ «Սա հերթական քաղաքական շոուն է, կասկածանքը շինծու է. այն, ինչ ինձ վերագրվում է, բոլորովին կապ չունի ինձ հետ»,֊ նշել է Սուրեն Մանուկյանը։
Հիշեցնենք, որ այսօր «Ազատ դեմոկրատներ» կուսակցության նախագահ Խաչատուր Քոքոբելյանը հայտարարել է, որ ձերբակալվել է ՀՅԴ Հայաստանի Գերագույն մարմնի անդամ, ԱԺ նախկին պատգամավոր Սուրեն Մանուկյանը և ևս երկու հոգի՝ իր հոր առևանգման գործի շրջանակներում։
