«Ազատություն» ռ/կ-ի գրասենյակ ներխուժման փորձի գործով այսօր կայացած նախնական լսումների ժամանակ, դատարանը հստակեցրեց հետազոտման ենթակա ապացույցների ծավալը: Մեղադրողը նաեւ մեղադրական եզրակացությունը ներկայացրեց:
Այս քրեական գործը բաղկացած է 9 հատորից: Պաշտպանական կողմը հայտարարեց, որ գործում ներկայացված յուրաքանչյուր փաստաթղթի անդրադառնալու են եւ առաջարկեց, որ ապացույցները հետազոտվեն ամբողջ ծավալով: Պաշտպանները նաեւ ժամանակ խնդրեցին՝ գործի ամբողջական նյութերին ծանոթանալու համար, քանի որ այս գործը «ճյուղավորվում» է այլ քրեական վարույթների հետ: Պաշտպանները չեն բացառում, որ արդյունքում պարզվի, որ այս գործով մեղադրվող անձինք զանգվածային անկարգություններ չեն էլ իրականացրել:
Պաշտպանները նաեւ պահանջեցին, որ մեղադրողը հստակ ներկայացնի, թե ո՞ր մեղադրյալին ի՞նչ դրվագով է մեղադրանքը ներկայացված: Գործով մեղադրյալները նույնպես միացան պաշտպանների պահանջին: Գործով մեղադրյալ Բագրատ Եսայանն էլ հայտարարեց, որ նաեւ լրացուցիչ փաստաթղթեր կներկայացվեն, որոնք ի ցույց կդնեն այս ողջ շղթայում ՀՀ գործող իշխանության հանցավոր կեցվածքը: Նաեւ հավելեց, որ բոլոր այն պաշտոնյաները, ովքեր սատարել եւ շարունակում են սատարել ՀՀ գործող իշխանությանը՝ դառնում են հանցակից եւ հաջորդ իշխանության օրոք անպայման պատասխանատվության են ենթարկվելու իրենց արարքների համար: Բագրատ Եսայանը հավելեց, որ այս պահին ինքը հրաժարվում է ցուցմունք տալուց, որ պահին, որ գտնի դրա անհրաժեշտությունը, այդ պահին էլ հայտարարությամբ հանդես կգա:
ՀՅԴ-ական Գերասիմ Վարդանյանը ևս հրաժարվեց ցուցմունք տալուց. «Այս ամեն ինչը, ինչ կատարվում է, քաղաքական է, ունի մեկ նպատակ` թիրախավորել ինձ, իմ կուսակցությանը, ինձ բանտում պահելով, ինձ կաշկանդելով, փորձել նաեւ կաշկանդել ու խոչընդոտել իմ կուսակցության ու կուսակցական ընկերների աշխատանքը: Ես երկու հայտարարություն ունեմ անելու. մեկը գրավի հետ կապված: Եվս մեկ անգամ ասում եմ, ինձ հետ կապված փրկագին, աճուրդ, գրավ ես չեմ պատրաստվում վճարել, դա իմ անձնական որոշումն է, արգելել ու արգելելու եմ ցանկացած մեկին վճարել էդ գրավը: Երկրորդ, այն ինչ կատարվում է, քաղաքական պատվեր է, սա քաղաքական պայքար է, ու այդ պայքարը մեզ տանում է բանտ, ուրեմն մենք բանտից էլ կպայքարենք, բանտում կհաղթենք ու բանտից էլ կջախջախենք Նիկոլին»:
Նելլի ԳՐԻԳՈՐՅԱՆ
