«Այլընտրանք» ՀԿ-ի ղեկավար, «Հայաստան» դաշինքի անդամ Նարեկ Մանթաշյանը կալանավայրից դուրս գալուց հետո հիվանդանոցում է եղել: Նա Aravot.am-ի հետ զրույցում ասաց, որ ինտենսիվ բուժման փուլում է:
Երեւան քաղաքի ընդհանուր իրավասության դատարանի դատավոր Կարեն Ֆարխոյանի որոշմամբ Մանթաշյանը ազատ է արձակվել 20 մլն դրամ գրավի դիմաց:
Հիշեցնենք, որ մեղադրական եզրակացության համաձայն, Մանթաշյանը առանց դատավոր Աննա Դանիբեկյանի համաձայնության, 2020 թվականի ապրիլի 9-ին «Հայելի ակումբում» ասուլիսի ժամանակ հրապարակել է Դանիբեկյանի քթի վիրահատության մասին տեղեկությունը: Բացի այդ, մեղադրականում նշվում է, որ նա 2020-ի նոյեմբերի 9-ին բողոքի ցույցերի ժամանակ դրոշ է գողացել:
Մանթաշյանը հայտարարում է, որ ինքը քաղաքական պատանդ է եղել 7 ամիս. «Ի սկզբանե այս գործը շուրջ մեկ տարի շարունակ առանց խափանման միջոց է եղել, դրսում եմ եղել, հետո քաղաքական նպատակահարմարությունից ելնելով՝ վերցրել են կալանքի տակ: Նիստերն ընթացել են ոչ օրինական ձեւով ու ոչ հումանիզմով, իմ գործը համապատասխանում է միջազգային ատյանների կողմից տրված քաղաքական բանտարկյալի չափանիշներին»:
Կարդացեք նաև
Դատավոր Ֆարխոյանի որոշումը դատարանի դահլիճում ծափերի արժանացավ, Մանթաշյանի պաշտպան Կոչուբաեւն էլ հայտարարեց, որ Ֆարխոյանին այս որոշումը կայացնելը հեշտ չի եղել: Հարցին՝ կարո՞ղ ենք ասել, որ քաղաքական գործերով սառույցը կոտրվել է, ի՞նչ սպասելիքներ ունեք դատական ակտից՝ Մանթաշյանը պատասխանեց. «Նախ, ծափերը վերաբերվում էին ընդամենը իմ ազատությանը, ոչ թե Ֆարխոյանի որոշմանը: Պարոն Ֆարխոյանի որոշումը հեչ էլ ծափահարությունների արժանի չի: Եթե սա քաղաքական չէր, սրանից ընդամենը 20 օր առաջ մենք առաջարկել էինք 12 մն դրամ գրավ եւ 6 պատգամավորի անձնական երաշխավորություն: Զուգահեռ նաեւ ասել էինք, որ եթե դատարանը գտնում է, որ 12 մլն-ը բավարար գումար չէ, որ կարող է զսպել իմ վարքագիծը, թող դատարանը ինքը որոշի գումարի չափը: Դրանից հետո 15 մլն ենք ասում ու պարզվում է, որ 20-ը բավարար է: Այդ դեպքում ի՞նչն էր խանգարում, որ դրանից մեկ ամիս առաջ, 3 ամիս առաջ այդ որոշումը կայացնեին, մենք դատարանին բոլոր միջնորդություններում տվել ենք գումարի չափը որոշելու հնարավորություն: Եթե սա քաղաքական պատվերով գործ չէ, ու եթե սա համաձայնեցնելով չէր վերին ատյանների հետ, թե ինձ թողնելու ժամանակն եկել է, ապա այս նույն որոշումը կարող էր լինել դեռեւս 7 ամիս առաջ»:
Դիտարկմանը, որ գուցե Արմեն Գրիգորյանի մահն ինչ-որ բան փոխեց՝ նա պատասխանեց. «Եթե Արմեն Գրիգորյանի հետ կապելու լինենք, ապա նույն դահլիճում Վերմիշյանի, Ավետիք Չալաբյանի դեպքում, երբ քննող դատավորը Մնացական Մարտիրոսյանն է էլի, նույն մարդն է, նրա վարքագծում որեւէ փոփոխություն չեմ նկատում այլ քաղաքական գործերի դեպքում, չեմ կարծում, որ մեկ այլ դատավոր ավելի զսպվածություն կդրսեւորեր, քան ինքը»:
Հռիփսիւմե ՋԵԲԵՋՅԱՆ
