Aravot.am-ը ԱԺ «Հայաստան» խմբակցության պատգամավոր, սահմանադրագետ Արամ Վարդեւանյանին խնդրեց մեկնաբանել օրերս ՀՀ արդարադատության նախարար Կարեն Անդրեասյանի այն հայտարարությունը, թե իշխանությունը կապ չունի ընդդիմադիրների ո՛չ կալանավորման, ո՛չ էլ ազատ արձակման հետ, իսկ ինքը ողջունում է դատարանի դահլիճում Արմեն Գրիգորյանի մահանալուց հետո առողջական լուրջ խնդիրներ ունեցող Նարեկ Մանթաշյանի եւ Միկա Բադալյանի խափանման միջոցը գրավի դիմաց փոխելը, որովհետեւ այդպես ՔԿՀ-ները բեռնաթափվում են, ասաց. «Եթե արդարադատության նախարարությունը կամ նախարարը նման հայտարարություն է անում, եթե կա խնդիր ՔԿՀ-ների բեռնաթափման, իսկ դա իրականում կա, ապա ուղղակի պետք է ընդունել համաներման մասին օրենք, ինչը տեւական ժամանակ է՝ չի արվում: Եթե ՔԿՀ-ներում պահվող անձանց 30 տոկոսից ավելիի մոտ կան առողջական խնդիրներ՝ քրոնիկ հիվանդություններ, նման պայմաններում պետությունը պետք է դրան արձագանքի: Եթե առողջական խնդիրը քրոնիկ է, ապա դրան պետք է միջամտել կտրուկ ձեւով՝ գնալ համաներման ճանապարհով: Բայց եթե նկատել եք, պետությունը որեւէ գործողություն չի անում»:
Հստակեցնող հարցին, թե ստացվում է, որ մարդկանց կալանավորում կամ ազատում են ոչ թե օրենքի պահանջի համապատասխան, այլ կալանավայրերում ազատ տեղերի հաշվարկո՞վ, պարոն Վարդեւանյանը պատասխանեց. «Չնայած դուք արդարադատության նախարարի մասով եք հարցնում, ես ձեզ կասեմ, որ արդարադատության նախարարության եւ այլ մարմինների էական անգործությունը իրականում պայմանավորված է ԵՄ դեսպանի վարքագծով: Նախկինում ԵՄ եւ ԱՄՆ դեսպանների վարքագիծը միշտ լինում էր, կարծես, շատ կարեւոր ազդանշան իրավապահ մարմինների համար: Իսկ այսօր իրենք հակառակ ազդանշեն են տալիս, իրենք կանաչ լույս են վառում, որ Արմեն Գրիգորյանի ծանր, իրականում ամենավատ իմաստով աննախադեպ դեպքը լինի ոչ թե եզակի, ոչ թե միակը, այլ այդպիսի դեպքերը շարունակական լինեն: Ու ես սա մեծ, շատ մեծ ցավով եմ ասում»:
Հետաքրքրվեցինք, որ եթե ասում է կանաչ լույս է վառվում, որպեսզի մահվան կամ առողջական խնդիրներ ունենալու դեպքերը եզակի չլինեն, դա, արդյո՞ք, դավադրության տեսության դաշտից չէ, պատգամավորը պատասխանեց. «Փաստն եմ ասում: Կալանքը որպես նպատակ օգտագործվում է նաեւ մարդկանց առողջությունը քայքայելու համար: Դա հստակ է: Դա հատուկ է արվում: Դա պետական մակարդակով իրականացվող գործողություն է: Ես այդպես եմ տեսնում: Ես փաստեր եմ բերում: Այդքան առողջական խնդրով մարդի՞կ: Առողջական խնդիրներ լինում են ի սկզբանե, բայց սրվում են, վատթարանում են ՔԿՀ-ում գտնվելու ընթացքում: Սա, կներեք, ես պատահականություն չեմ կարող համարել: Առողջական մարտահրավերները շատացել են, իսկ ՔԿՀ-ները դրանց դիմակայելու օբյեկտիվ հնարավորությունները չեն ունեցել: Եթե դրան էլ ավելացնենք այն, որ այդ ամենը հստակ ուղղորդված է կատարվում, ստանում ենք այն պատկերը, որն այսօր ունենք»:
Աշոտ ՀԱԿՈԲՅԱՆ
