Շիրակի մարզի ընդհանուր իրավասության դատարանում այսօր շարունակվել է այսպես ասած «պապիկների գործով» դատական նիստը։ Դատավոր Ռոման Սմբատյանի որոշմամբ կալանավորված հինգ երիտասարդներից երեքը՝ Գևորգ Մուրադյանը, Արսեն Մարտոյան, Գոռ Մաթևոսյանը 1,5 միլիոն դրամ գրավի դիմաց ազատ են արձակվել։ Այս մասին տեղեկացանք նրանց շահերը պաշտպանող փաստաբան Աբգար Պողոսյանից։
Դատարանը մերժել է ԱԺ դաշնակցական պատգամավոր Գեղամ Մանուկյանի որդու Տարոն Մանուկյանի և Գոռ Սարգսյանի կալանքը գրավով փոխարինելու կամ երաշխավորով ազատ արձակելու միջնորդությունը։
Հիշեցնենք, որ երիտասարդները մեղադրվում են ընդդիմադիրների ավտոերթի օրը Գյումրու Երևանյան խճուղու կանգառներից մեկում տարեց տղամարդկանց բռնության ենթարկելու մեջ։
3 տուժողների շահերը ներկայացնող Կարեն Բարսեղյանը, որը Արցախի Հանրապետության փաստաբանների պալատի անդամ է,տուժողների անունից հայտարարել էր, որ նրանք ոչ մի բողոք ու պահանջ չունեն։
Կարդացեք նաև
Դատարանում այսօր ցուցմունք են տվել 4 տուժողները, որոնք վերահաստատել են իրենց նախաքննական վերջին ցուցմունքները՝ հայտարարելով, որ կալանավորվածներին չեն ճանաչում, բողոք-պահանջ չունեն։
Երիտասարդներից չորսը պատերազմի մասնակիցներ են, նրանցից մի քանիսը պարգևատրվել են Արցախի Հանրապետության նախագահի կողմից, ոմանք վիրավորում ունեն։ Տարոն Մանուկյանը՝ ԱԺ պատգամավոր Գեղամ Մանուկյանի որդին 44 օրյա պատերազմի, իսկ Գոռ Սարգսյանը՝ արցախյան երկու պատերազմների մասնակից է։
Հաջորդ դատական նիստը օգոստոսի 15-ին է։
Նունե ԱՐԵՎՇԱՏՅԱՆ
