ԱԻՆ-ը և FPWC-ն համագործակցության հուշագիր են կնքել
ՀՀ արտակարգ իրավիճակների նախարարությունը, ի դեմս նախարար՝ Արմեն Փամբուխչյանի և Վայրի բնության և մշակութային արժեքների պահպանման հիմնադրամը (FPWC)՝ ի դեմս հիմնադիր՝ Ռուբեն Խաչատրյանի համագործակցության հուշագիր կնքեցին։ Հուշագրի կնքումը տեղի ունեցավ Կովկասյան կենսաբազմազանության ապաստարանում։ Հուշագրով կողմերը նախատեսում են համագործակցել իրենց հնարավորությունների, միջոցների և փորձի կիրառմամբ:
ՀՀ արտակարգ իրավիճակների նախարար Արմեն Փամբուխչյանն ընդգծեց՝ այս փոխօգնության հուշագրով պետությունն ու հասարակական կազմակերպությունը մեկտեղում են իրենց ուժերը վայրի բնության պահպանության ոլորտներում։ Նա կարևորեց նման հուշագրի կնքումը։
«Արտակարգ իրավիճակների նախարարության հետ մեր աշխատանքը շատ կարևոր է, համագործակցում ենք վայրի կենդանիների փրկության, ինչպես նաև հրդեհների արագ արձագանքման ոլորտներում։ Ես իմ շնորհակալությունն եմ հայտնում պարոն նախարարին այս հնարավորության համար։ Մենք տևական ժամանակ է՝ շատ լավ համագործակցում ենք, և վստահ եմ՝ շարունակությունն էլ ավելի արգասաբեր է լինելու»,-նշեց Վայրի բնության և մշակութային արժեքների պահպանման հիմնադրամի տնօրեն Ռուբեն Խաչատրյանը։
Կարդացեք նաև
Հուշագրի ստորագրման ընթացքում Խաչատրյանը հավելեց, որ ԱԻՆ տարեկան 10 աշխատակիցների համար հիմնադրամի ռեսուրսներով կազմակերպելու են թրեյնինգներ։
Կողմերը համաձայնեցին համագործակցել արտակարգ իրավիճակների դեպքում և նպաստել առկա խնդիրների հրատապ լուծմանը, համադրել ուժերը ՀՀ ողջ տարածքում՝ փորձելով հնարավորինս անվնաս կերպով բռնել, տեղափոխել, մեկուսացնել և/կամ բնություն վերադարձնել խնդրահարույց կենդանիներին, հրդեհավտանգ ամիսներին վայրի բնության և/կամ անտառային հրդեհների դեպքում համատեղ ջանքերով իրականացնել հրդեհաշիջման աշխատանքներ Կովկասյան կենսաբազմազանության ապաստարանում և հարակից տարածքներում։
Հուշագիրը կնքվել է 5 տարի ժամկետով։ Հուշագրի ժամկետը կերկարաձգվի ևս 5 տարով՝ կողմերի համաձայնության դրա գործողությունը չդադարեցվելու դեպքում:
Վայրի բնության և մշակութային արժեքների պահպանման հիմնադրամ
