Այսօր Երեւանի ընդհանուր իրավասության դատարանի Կենտրոն նստավայրում դատավոր Մնացական Մարտիրոսյանը Ավետիք Չալաբյանի գործով նիստի ժամանակ որոշեց հանրային պաշտպան ներգրավել:
Հիշեցնենք, որ «ԱրԱր» հիմնադրամի համահիմնադիր, «Համախմբում» շարժման անդամ Ավետիք Չալաբյանը մեղադրվում է երկու կամ ավելի անձանց հավաքներին մասնակցելու նպատակով նյութապես շահագրգռելու համար։
Չալաբյանի պաշտպան Վարազդատ Հարությունյանը լրագրողների հետ ճեպազրույցում ասաց, որ դատավոր Մնացական Մարտիրոսյանին կարծես Մարդու իրավունքների կոնվենցիան ընդհանրապես չի հետաքրքրում. «Մենք արդեն երկու օր է խոսում ենք այդ կոնվենցիայից, պարոն Մնացական Մարտիրոսյանը Քրեադատավարության օրենքի տառին հետեւելու պատրվակի տակ անտեսում է հիմնարար իրավունքները: Մարդու իրավունքների եվրոպական կոնվենցիայի 6-րդ հոդվածի համաձայն, յուրաքանչյուր ոք իրավունք ունի իր ընտրած պաշտպանի օգնությամբ իրականացնելու իր պաշտպանությունը: Ավետիք Չալաբյանը հայտնել է այդ մասին, որ ինքը հանրային պաշտպանի ծառայությունից չի ուզում օգտվի, քանի որ նախ ինքը վճարունակ է, երկրորդը՝ իր պաշտպաններին ընտրել է արդեն: Այսինքն, ի՞նչ է ստացվում՝ բերել զոռով մարդու գլխին կապել պաշտպան, որը այդ մարդը չի ուզում, չի ուզում իր փաստաբանական գաղտնիքը հայտնի դառնա մի պաշտպանի, որին ինքը չի վստահում: Մնացական Մարտիրոսյանը Հռոմի պապից ավելի կաթոլիկ է ուզում երեւալ ու նոր պաշտպան է տրամադրո՞ւմ»:
Կարդացեք նաև
Նա ասաց, որ երեկ պաշտպաններից մեկը ի սկզբանե ծանուցված չի եղել դատական նիստի մասին. «Ակնհայտորեն, բացահայտ կերպով մերժում են արդարադատությունը, դատարանն ասում է ՝ ես թքած ունեմ ձեր հիմնարար իրավունքների վրա, թքած ունեմ, որ դուք գործի նյութերին չեք ծանոթացել, ես շարունակում եմ քննությունը ու դուք պարտավոր եք իրականացնել պաշտպանություն այն պայմաններում, երբ որ դուք ծանոթ չեք գործի նյութերին: Դա նշանակում է, որ ինքը մերժում է արդարադատություն ապահովել:
Հարցին՝ ինչո՞ւ է ուզում դատավոր Մնացական Մարտիրոսյանը զրկել Չալաբյանին պաշտպանությունից՝ Վարազատ Հարությունյանը պատասխանեց. «Եկեք իրերն իրենց անունով կոչենք՝ Մնացական Մարտիրոսյանը ոչ թե ուզում է զրկել պաշտպանությունից, այլ քրեական հետապնդում իրականացնող մարմինները խախտել են պաշտպանության իրավունքը, Մնացական Մարտիրոսյանը շարունակում է թելել իրենց թելը»:
Հռիփսիմե ՋԵԲԵՋՅԱՆ
