Aravot.am-ի տեղեկություններով, հուլիսի 24-ին Արմավիրի մարզի Գայ գյուղում հոր կողմից դանակահարված ու հիվանդանոցի ճանապարհին մահացած երիտասարդը հոգեկան առողջության հետ կապված խնդիրներ ուներ: Հոգեպես անառողջ է նաեւ մահացած երիտասարդի մայրը:
Մահացած երիտասարդը ապրում էր հոր, մոր հետ, ուներ նաեւ ամուսնացած եղբայր, որն առանձին էր ապրում:
Դանակահարությանը նախորդել է հերթական վիճաբանությունը: Ըստ տեղեկությունների՝ երիտասարդը հարձակվել է հոր վրա եւ, ըստ նախնական տեղեկությունների, հայրն ավելի շատ ինքնապաշտպանվելու համար է դանակը ձեռքն առել: Այս պահին հայրը քննչական կոմիտեում հարցաքննվում է:
Գյուղում երիտասարդին բնորոշում են կոնֆլիկտային, մշտապես ագրեսիվ ու վատ վարքով աչքի ընկնող: Նա մշտապես կռիվներ է սարքել ոչ միայն տանը, այլ՝ խանութներում, բակում:
Կարդացեք նաև
Այս ընտանիքն ապրում էր գյուղի եկեղեցու հենց դիմաց, ու, երբ վերջերս համայնքապետարանից միջոցառում էին կազմակերպել եկեղեցու բակում՝ երգ ու երաժշտությամբ, այս երիտասարդը տնից հանել է իրենց դինամիկները ու ավելի բարձր երգ դրել՝ պահանջելով, որ հեռանան, իրեն խանգարում են: Չնայած երիտասարդի հոգեկան առողջական խնդիրներին, նրան հոգեբուժարանից տուն են ուղարկել:
Ի տարբերություն որդու՝ հորը գյուղում բնութագրում են որպես հանգիստ ու լավ մարդ, որը ջերմեռանդ հավատացյալ էր ու եկեղեցում պատարագների ժամանակ երգում էր:
Ըստ ՀՀ ոստիկանության հաղորդագրության՝ «Հուլիսի 24-ին, ժամը 18.30-ին, ոստիկանություն զանգած քաղաքացին հայտնեց, որ Արմավիրի մարզի Գայ գյուղի եկեղեցու մոտ դանակահարություն է եղել, և վնասվածք ստացած տղամարդը տեղափոխվել է հիվանդանոց։ 20 րոպե անց ոստիկանության Վաղարշապատի բաժնում ստացվեց մեկ այլ ահազանգ՝ այս անգամ «Վաղարշապատ» բժշկական կենտրոնից։ Հայտնում էին, որ դանակահարված վիճակում հիվանդանոց տեղափոխված 30-ամյա Գաբրիել Մանուկյանը մահացել է։
Գայ գյուղ մեկնած օպերատիվ-քննչական խմբերը պարզեցին, որ ժամը 18-ի սահմաններում Գաբրիել Մանուկյանին խոհանոցային դանակով խփել էր 65-ամյա հայրը։
Ըստ նախնական տվյալների՝ հոր և որդու միջև հերթական անգամ կենցաղային հարցերի շուրջ վիճաբանություն էր եղել, այդ ընթացքում էլ 65-ամյա տղամարդը որդուն դանակահարել էր։
65-ամյա տղամարդը տվել է խոստովանական բացատրություն ու ձերբակալվել։ Հանցագործության գործիք դանակը հայտնաբերվել և առգրավվել է»։
Արփինե ՍԻՄՈՆՅԱՆ
