«Քաղաքապետի ասածը վերաբերում էր վարչական շրջանների վարչական շենքի վրա տեղադրված բարձրախոսներին կամ շչակներին, եւ, բնականաբար, դրանց ձայնը չի կարող տարածվել ամբողջ վարչական շրջանով մեկ»,-Aravot.am-ի հետ զրույցում ասաց Երեւանի ավագանու «Լույս» խմբակցության ղեկավար Դավիթ Խաժակյանը՝ մեկնաբանելով Երեւանի քաղաքապետի որոշումը, որը հասարակության շրջանում բուռն քննարկումների առիթ է դարձել:
Քաղաքապետ Հրաչյա Սարգսյանը երեկ ֆեյսբուքյան գրառում էր կատարել՝ նշելով, որ քաղաքը պիտի շուտ արթնանա եւ այսուհետ առավոտյան 07:00 -ից յուրաքանչյուր ժամը մեկ Երեւանի քաղաքապետարանի աշտարակային ժամացույցից լսվող երաժշտությունը կհնչի նաեւ միաժամանակ 12 վարչական շրջաններում:
Դավիթ Խաժակյանից հետաքրքրվեցինք՝ որքանով է կիսում Հրաչյա Սարգսյանի այս նախաձեռնությունը, որը հարուցել է մայրաքաղաքի բնակիչների դժգոհությունը:
Դավիթ Խաժակյանի խոսքով, այդ ձայնն ընդամենը լսելի է լինելու վարչական շենքին հարակից շենքերի համար, ինչպես ասենք Երեւանի քաղաքապետարանին կից շենքերի համար՝ քաղաքապետարանից արձակվող ձայնը. «Ընդ որում, դա հաշված վայրկյաններ տեւող ձայն է եւ անգամ, եթե դա մարդկանց դուր չի գալիս, դրա ազդեցությունը շատ չնչին է լինելու, ուստի այս մեծ աղմուկի էական պատճառ ես չեմ տեսնում՝ չհաշված, որ ամառ է եւ քաղաքական ակտուալ թեմաներ չկան քննարկելու եւ պետք է ինչ-որ մի բան գտնել, քննարկել»:
Կարդացեք նաև
Պարոն Խաժակյանն ասաց, որ, եթե հարակից շենքերի բնակիչներից լինեն էական բողոքներ, ապա այդ որոշումը կվերանայվի. «Այսինքն՝ իսկապես, մեծ քննարկումների, բանավեճերի թեմա չէ»:
Aravot.am-ի հարցին՝ քաղաքացիներն իրենց քննարկումներում մտահոգություն են հայտնում, որ խախտվելու է իրենց հանգստի իրավունքը, քանի որ որոշման նպատակը հենց մարդկանց վաղ արթնացնելն է, Դավիթ Խաժակյանն ասաց՝ այդ ձայնը 3-4 վայրկյան տեւողությամբ անհանգստություն չառաջացնող ձայն է. «Կրկնում եմ, եթե հարակից շենքի բնակիչները բողոքեն, որ խաթարվում է իրենց եւ երեխաների քունը, վստահ եմ, որ որոշումը կվերանայվի»:
Դավիթ Խաժակյանի խոսքով՝ այն, որ պետք է ձգտենք շուտ արթնանալ, ինչու ոչ նաեւ շուտ քնել, որպեսզի ավելի արդյունավետ աշխատենք՝ միանշանակ է. «Բայց ուզում եմ ասել՝ լրջացնել այս խոսակցությունն այն աստիճանի, որ քաղաքապետը ստիպելու է մարդկանց շուտ արթնանալ, չեմ կարծում՝ ճիշտ է»:
Լուսինե ԲՈՒԴԱՂՅԱՆ
Պարզ է որ ԼՀԿ ն իշխանության ցանկացած աբսուրդ որոշում պետք է արդարացնի։ Մի հատ էլ քաղաքապետարանի Մուտի վրա գրեք “Աշխատանքը ազատագրում է” ու վերջ։ Հասկացողը հասկացավ