ՀՀ ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանը եւ հանձնաժողովի անդամ Մարիա Կարապետյանը հուլիսի 22-ին հանդիպել են Եվրոպական խորհրդարանի արտաքին հարցերով կոմիտեի (AFET) նախագահ Դեյվիդ Մքալիսթերի գլխավորած պատվիրակությանը:
Էդուարդ Աղաջանյանը, ողջունելով հյուրերին խորհրդարանում, կարեւորել է պատվիրակության այցը Հայաստան: Հանձնաժողովի նախագահը ներկայացրել է Լեռնային Ղարաբաղի հակամարտության պատմությունը, ստեղծված իրավիճակը եւ հայկական կողմի դիրքորոշումը տարածաշրջանային խաղաղության ու կայունության հաստատմանն ուղղված գործընթացների, ինչպես նաեւ Հայաստանի եւ Ադրբեջանի միջեւ հարաբերությունների կարգավորման շուրջ բանակցությունների վերաբերյալ:
Էդուարդ Աղաջանյանն ընդգծել է Լեռնային Ղարաբաղում ապրող ժողովրդի անվտանգության եւ իրավունքների պաշտպանության հարցը՝ նշելով, որ նրանք այսօր կանգնած են անվտանգային մարտահրավերների առջեւ: «Մենք պատերազմը չենք տեսնում որպես խնդրի լուծում, խաղաղությունն է մեր օրակարգը, եւ ակնկալում ենք մեր միջազգային գործընկերների աջակցությունն այս հարցում»,- ասել է Էդուարդ Աղաջանյանը:
Կարդացեք նաև
«Մենք ասում ենք, որ հակամարտությունը դեռեւս ավարտված չէ, որովհետեւ խնդիրը լուծված չէ»,- նշել է Մարիա Կարապետյանը՝ բարձրաձայնելով Լեռնային Ղարաբաղի ժողովրդի նկատմամբ իրականացվող ոտնձգությունների հարցը: Նրա խոսքով՝ գեղեցիկ բառերով միջազգային հանրությանն ադրբեջանական կողմից ներկայացվող իրավիճակը չի համապատասխանում իրականությանը: «Մենք ցանկանում ենք հակամարտությունը լուծել: Պատերազմն ավարտվել է, բայց խնդիրը չի լուծվել»,- ասել է պատգամավորը՝ պատվիրակության անդամների ուշադրությունն ուղղելով խոսքերի եւ գործողությունների անհամապատասխանությանը:
Եվրոպական խորհրդարանի արտաքին հարցերով կոմիտեի (AFET) նախագահ Դեյվիդ Մքալիսթերը նշել է, որ իրենք ցանկանում են կառուցողական ճանապարհով աջակցել հարցի լուծմանը:
Անդրադարձ է եղել նաեւ տրանսպորտային ճանապարհների բացման հնարավորություններին, Ադրբեջանում գտնվող հայ ռազմագերիների ու պահվող այլ անձանց հայրենադարձության, Արցախի մշակութային ժառանգության պահպանման հարցերին:
ՀՀ Ազգային ժողով
