Երեւան քաղաքի ընդհանուր իրավասության դատարանը, դատավոր Արուսյակ Ալեքսանյանի նախագահությամբ, քիչ առաջ որոշեց գրավի դիմաց ազատ արձակել «Ազատագրում» շարժման ղեկավար Միքայել Բադալյանին:
Հիշեցնենք, «Արմավիր» ՔԿՀ-ում գտնվող Միքայել Բադալյանի առողջական վիճակն այսօր կտրուկ վատացել էր, նախաինսուլտային վիճակում նրան տեղափոխել էին Վաղարշապատի հիվանդանոց, ապա՝ Երեւան: Միքայել Բադալյանի պաշտպանական խումբը նրա նկատմամբ կիրառված կալանքն այլընտրանքային խափանման միջոցով փոխարինելու միջնորդությունն էր ներկայացրել: «Միջնորդության հիմքում էական նոր փաստարկ է հանդիսանում Մ. Բադալյանի առողջական վիճակի կտրուկ վատթարացումը։ Առաջարկել ենք դատարանին նաեւ վերջինիս կալանքը փոխարինել գրավով՝ 5 մլն ՀՀ դրամի չափով»,- տեղեկացրել էր պաշտպան Էրիկ Ալեքսանյանը:
Հիշեցնենք, որ ըստ ԱԱԾ-ի՝ Միկա Բադալյանը, չունենալով նախապատրաստվող ահաբեկչության վերաբերյալ տվյալներ, 2022թ․-ին իր տելեգրամյան էջում տվել է առերևույթ սուտ հաղորդում հանցագործության մասին։ Նա կալանավորված է մայիսի 24-ից: Նա բերման էր ենթարկվել ապրիլի-22 ին, Ազատության հրապարակից:
Միքայել Բադալյանի պաշտպանական խումբը գտնում է, որ նա ոչ միայն պետք է կալանքից ազատ արձակվի, այլեւ վերջինիս նկատմամբ հարուցված քրեական հետապնդումն արդարացման հիմքով պետք է դադարեցվի։
Կարդացեք նաև
Քիչ առաջ հայտնի դարձավ, որ Միքայել Բադալյանը 6 մլն դրամ գրավի դիմաց ազատ կարձակվի՝ գումարը վճարելուց հետո:
Նելլի ԳՐԻԳՈՐՅԱՆ
