Ըստ փորձագետի, Հայաստանի արտաքին ներդրումները ՀՆԱ-ի մեջ 1,7 տոկոսն են կազմել, ինչը շատ քիչ է:
Ներդրումների բարեփոխումների ճանապարհային քարտեզը ներկայացնելու համար Հայաստան են ժամանել միջազգային փորձագետներ: Այսօր փորձագետ Հենրի Լորենդըլ քարտեզի շնորհանդեսի ժամանակ ասաց, որ այն Հայաստանի օրենսդրության, կատարյալ մի փաստաթուղթ է եւ ընդգրկում է բոլոր առանցքային քաղաքականությունները, արտաքին ներդրումների գրավման հիմնական ոլորտները՝ իր մեջ մարմնավորելով լավագույն փորձն ու Հայաստանի պահանջները. «Այն շատ իրատեսական է ու ռացիոնալ խորհուրդներ է տալիս»,-ասաց նա: Միջազգային փորձագետը գտնում է, որ միջազգային արժեքների ստեղծման շղթաներում Հայաստանի մասնակցությունն ավելացնելու համար պետք է ներգրավել բազմազգ կոորպորացիաների, ինչ համար Հայաստանում պետք է հզորացնել արտահանմանն ուղղված գործունեությունը՝ ոչ միայն տարածաշրջան այլ նաեւ դեպի աշխարհ:
«Այս քարտեզում Հայաստանը ցույց է տվել, որ մեծ առաջընթաց է ունեցել մարդկային զարգացման, նյութատեխնիկական ու հմտությունների զարգացման տեսակետից: Այս քարտեզը կօգնի նաեւ նոր ստեղծվող շուկաներին»,-ասաց փորձագետը: Նրա խոսքով, երկրում պետք է արվեն տեխնոլոգիական ներդրումներ, որպեսզի տաղանդները երկրից դուրս չգան՝ ինչպես որ աֆրիկյան երկրներում են: Նա ճանապարհային քարտեզի առկայությունը նաեւ կարեւոր է համարում այն բանի համար, որպեսզի Հայաստանի բազմամիլիոնանոց սփյուռքն օգտագործվի:
Ասաց, որ արտաքին ներդրումները կարեւոր են այն առումով, որ խթանում են տարածշրջանային զարգացումները՝ մասնավորապես բարձրացնելով աղքատ տարածաշրջանի տնտեսական մակարդակը:
Փորձագետը գտնում է, որ Հայաստանն անցած տարիների ընթացքում այնքան էլ լավ չի գործել արտաքին ներդրումներ ներգրավելու առումով եւ բավականին հետ է մնում մրցակից երկրներից: Նա ասաց, որ մեր երկրի արտաքին ներդրումները ՀՆԱ-ի մեջ 1,7 տոկոսն են կազմել, ինչը շատ քիչ է:
Նրա խոսքով, Հայաստանում գործարար միջավայրը բավականին լավն է, մրցակցային է, թե՛ հարկերի, թե՛ գործ անելու տեսակետից, բայց այն կատարյալ չէ, կարելի է ուժեղացնել:
Լուսինե ԲՈՒԴԱՂՅԱՆ
