«Էդտեղ «Կովկաս Ագրո» կա, իրենց տարածքը մեր վարչական շրջանում է, բայց աշխարհագրական դիրքն այնպիսին է, որ աշխատակիցները պրոպուսկով են անցուդարձ անում, ռուս սահմանապահներ էլ կան։ Նախնական վարկածն, ըստ ԱԱԾ-ի, այն է, որ հայ աշխատակիցները կպել են սահմանային փշալարերին, տրիվոգան միացել է։ Էն կողմը աշխատող բանվորներ կան, հավանաբար էդպես են խոսակցությունները տարածվել, թե՝ թուրքերը, չգիտեմ ովքեր․․․»,- Արագածավանի համայնքապետ Արթուր Հովսեփյանն Aravot.am-ի հետ զրույցում այսպես ներկայացրեց համայնքում տեղի ունեցած այսօրվա միջադեպը ։
Հիշեցնենք, որ լրատվամիջոցները գրել էին՝ Թալինի Արագածավան գյուղում երեք զինված թուրքեր ութ հովիվների` իրենց անասուններով, գերի են վերցրել, որոշ ժամանակ անց ռուսական կողմի միջնորդությամբ սկզբում անասուններին են բաց թողել, այնուհետև` հովիվներին։
Aravot.am-ի հետ զրույցում Թալին խոշորացված համայնքի ղեկավար Տավրոս Սափեյանը հայտնել էր, «Նման բան չկա, չորս հովիվ՝ ազգությամբ թուրք, ցանկացել են լողալ Արաքս գետում, «գասպարալող» տալ, ռուս սահմանապահներն ասել են՝ վերադարձեք, արգելել են լողալ»։
Արագածավանի մարզպետարանն արձագանքելով շրջանառվող լուրերին, հայտնել է՝այն չի համապատասխանում իրականությանը։
Մարզպետարանի ֆեյսբուքի իր պաշտոնական էջում գրված է․«Արագածավան ոչ մի թուրք չի մտել, ոչ մի հովիվ գերի չէ։ Չենք բացառում, որ կեղծ ահազանգը կարող էր որևէ մեկի կամ մի խումբ անձանց նենգ ու ոչ ողջամիտ արարքը լինել։
Կարդացեք նաև
Լրատվամիջոցներին կոչ ենք անում առանց տեղեկատվությունը պաշտոնապես ճշգրտելու չհրապարակել իրականությանը չհամապատասխանող լուրեր, առավել ևս, երբ դրանք վերաբերում են մեր հայրենակիցների անվտանգությանը»։
Sputnik Արմենիա –ն տելեգրամյան իր ալիքում գրել է․«ՀՀ-ում Ռուսաստանի ԱԴԾ (անվտանգության դաշնային ծառայության, ФСБ) սահմանային վարչությունը և ԱԱԾ-ն հերքում են թուրքական զինուժի կողմից ՀՀ սահմանը հատելու մասին մամուլում տարածված տեղեկատվությունը, հայտնել են Sputnik Արմենիային ԱԴԾ սահմանային վարչության մամուլի ծառայությունից»։
Նելլի ԲԱԲԱՅԱՆ
