Թալին խոշորացված համայնքի ղեկավար Տավրոս Սափեյանը հերքում է լրատվամիջոցներում տարածված այն տեղեկատվությունը, թե Արագածոտնի մարզի Արագածավան գյուղ են ներխուժել զինված թուրքեր, գերի են վերցրել հովիվների եւ անասունների։
«Նման բան չկա, չորս հովիվ ցանկացել են լողալ Արաքս գետում, «գասպարալող» տալ, ռուս սահմանապահներն ասել են՝ վերադարձեք, արգելել են լողալ։ Դա ապատեղեկատվություն է, լայքեր հավաքելու համար են անում։ Նման բան չկա, ԱԱԾ պետը, ոստիկանության պետը, համայնքի ղեկավար, բնակիչները, ամբողջ Արագածոտնը խառնվել են իրար, բայց նման բան չկա, ոչ մեկին էլ գերի չեն վերցրել, ի՞նչ զենք, ոչ մի զենք նրանց մոտ չի եղել։ Այդ հատվածում գետը վարարող է, ֆիզիկապես հնարավոր չէ անցնել գետի այդ մասը, ո’չ թուրքը, ո՛չ էլ հայը, եթե ինքնասպանություն չեն ուզում գործել»,-ասաց Սափեյանը։
Հիշեցնենք, մամուլում տեղեկություններ են շրջանառվում, որ Արագածավանում լարված իրավիճակ է. երեք զինված թուրքեր ութ հովիվների` իրենց անասուններով, գերի են վերցրել, որոշ ժամանակ անց ռուսական կողմի միջնորդությամբ սկզբում անասուններին են բաց թողել, այնուհետեւ` հովիվներին։
Նշենք, որ Civic.am-ի հետ զրույցում Արագածավան խոշորացված համայնքի համայնքապետ Արթուր Հովսեփյանը նշել է․«Գյուղի սահմաններից դուրս` դեպի Թուրքիայի սահման գտնվող ֆերմայում աշխատող բանվորները, որտեղ մուտքը անցաթղթով է և հսկվում է ռուս սահմանապահների կողմից, մնացել են սահմանից այն կողմ, որից հետո ահազանգ է հնչեցվել, ռուս սահմանապահները ահազանգին արձագանքել են և բանվորներին վերադարձրել Հայաստանի սահման։ Գյուղում որևէ թուրք չկա և չի էլ եղել»։
Կարդացեք նաև
Նելլի ԲԱԲԱՅԱՆ
