Քիչ առաջ Երևան քաղաքի ընդհանուր իրավասության դատարանի Կենտրոնի նստավայրում, դատավոր Կարեն Ֆարխոյանի նախագահությամբ դատարանը որոշում կայացրեց բավարարել Նարեկ Մանթաշյանի պաշտպան Ալեքսանդր Կոչուբաևի միջնորդությունը՝ Նարեկ Մանթաշյանի կալանքը փոփոխել, խափանման միջոց ընտրել գրավը։
Կարեն Ֆարխոյանն ասաց՝ Նարեկ Մանթաշյանը ազատ կարձակվի 20 մլն դրամ գրավի՝ մուծված լինելու անդորրագիրը ներկայացնելուց հետո։
Այս որոշումը դատական նիստերի դահլիճում գտնվող՝ Նարեկ Մանթաշյանի ընկերների, հարազատների կողմից ընդունվեց ծափերով և ուրախ բացականչություններով։ Նրանք գոչում էին՝ ապրես, դատավոր ջան։
Նարեկ Մանթաշյանի մայրը լրագրողների հետ զրույցում ասաց․ «Անկեղծ չէի հավատում, որովհետև յոթ ամիս է նույն սպասումով գալիս եմ, գնում։ Այսօր, փառք Աստծո, փաստորեն արդարադատություն կա»։
Կարդացեք նաև
Այս գործով հաջորդ դատական նիստը տեղի կունենա օգոստոսի 1-ին՝ ժամը 15․30-ին։
Ըստ մեղադրական եզրակացության` Մանթաշյանը առանց դատավոր Աննա Դանիբեկյանի համաձայնության, 2020 թվականի ապրիլի 9-ին «Հայելի ակումբում» ասուլիսի ժամանակ հրապարակել է Դանիբեկյանի քթի վիրահատության մասին տեղեկությունը:
Բացի այդ, մեղադրականում նշվում է, որ նա 2020-ի նոյեմբերի 9-ին բողոքի ցույցերի ժամանակ դրոշ է գողացել։
Տաթև ՀԱՐՈՒԹՅՈՒՆՅԱՆ
