«Բնականաբար, որպես դատախազ չեմ կարող օրենքի սահմանադրականությունը գնահատել, բայց ըստ դատախազության՝ եթե աշխատում ենք այդ օրենքով, կիրառում ենք, գործի դնում ամեն օր, ապա հակաիրավական, հակասահմանադրական խնդիր չենք տեսնում»,-«Անցումային արդարադատության միջազգային կենտրոնի» կազմակերպած՝ «Ապօրինի գույքի վերադարձ եւ անցումային արդարադատություն․ դասեր եւ մարտահրավերներ» խորագրով քննարկման ժամանակ այսօր հայտարարեց ՀՀ դատախազության՝ ապօրինի ծագում ունեցող գույքի բռնագանձման գործերով վարչության ավագ դատախազ Գեւորգ Քոչարյանը՝ անդրադառնալով ապօրինի ծագման գույքի բռնագանձման օրենքի առնչությամբ ընդդիմության կողմից ՍԴ-ին հասցեագրված դիմումին։
«Մնացածը ՍԴ-ի տիրույթում է։ Դատախազությունն իր հիմնավորումները ներկայացրել է ՍԴ»,-հավելեց Գեւորգ Քոչարյանը։ Նա նաեւ նշեց՝ որոշ շրջանակներ ՍԴ-ին ուղղված այդ դիմումի հետ կապված հույսեր ունեն, որ սահմանադրականության հետ կապված խնդիրներ կարձանագրվեն․ «Սա էլ է հաշտության չգալու օբյեկտիվ պատճառ»։
Կարդացեք նաև
Ինչ վերաբերում է ՀՀ պաշտպանության նախկին նախարար Սեյրան Օհանյանի առանձնատան վերաբերյալ հայցին, ապա Գեւորգ Քոչարյանը նշեց, որ հետագա գործընթացը դատարանի տիրույթում է։
Լուիզա ՍՈՒՔԻԱՍՅԱՆ
