Արգենտինահայ կինոգործիչ, Արգենտինայում հայկական ֆիլմերի ցուցադրման Cinemateca Armenia նախագծի հիմնադիր Ջեք Պողոսյանն այս օրերին Երեւանում էր «Ոսկե ծիրան» կինոփառատոնի առիթով: Տարիներ առաջ հենց նա նախաձեռնեց Հայաստանի եւ Ռիո դե լա Պլատա գետի երկրների միջեւ մշակութային փոխանակում՝ Երեւանում կազմակերպելով արգենտինական տանգոյի մասին ֆիլմերի ցուցադրություն: Ուրուգվայական ընտրյալ կինոն նույնպես նրա միջոցով հասու դարձավ հայաստանցի հանդիսատեսին:
Aravot.am-ի հետ զրույցում Ջեքն ասաց, որ դեկտեմբերին կրկին պատրաստվում է Երեւանում իրականացնել արգենտինական եւ ուրուգվայական ֆիլմերի փառատոն:
Երեք տարվա ընդմիջումից հետո, որը պայմանավորված էր համավարակով եւ այլ հանգամանքներով, Ջեք Պողոսյանը կրկին կներկայացնի արգենտինական եւ ուրուգվայական ֆիլմեր: Նա ասաց, որ համավարակի շրջանում եւս շատ է աշխատել, բայց հիմնականում առցանց: Մտահղացումներ ունի` Բորխեսի եւ Կորտասարի հետ կապված, Հայաստան կբերի ֆիլմեր` հիմնված այդ երկու գրողների գործերի վրա:
Ջեք Պողոսյանը նշում է, որ Արգենտինայում հրաշալի ֆիլմեր կան տանգոյի մասին, ու հիմա ուզում է նոր ձեւաչափերով անել նույն ծրագիրը, գումարած`պարեր, երգեր, հույզեր:
Կարդացեք նաև
«Ուրուգվայական ֆիլմերի փառատոնը Հայաստանում կանցկացվի արդեն 11-րդ անգամ, ինչի համար շատ հպարտ եմ: Աշխարհի ոչ մի անկյունում չկա նման ֆիլմերի փառատոն: Շատ կարեւոր ծրագիր ունեմ, հիմա աշխատում եմ լավագույն ֆիլմերը Հայաստան բերելու ուղղությամբ»,-ասաց մեր զրուցակիցը:
Հետաքրքրվեցինք` ի վերջո նկարե՞ց Բորխեսի մասին իր ֆիլմը, որ ցանկանում էր իրագործել մինչեւ համավարակը: Ջեք Պողոսյանն ասաց, որ նույն սցենարը վերածել է պիեսի, եւ հնարավոր է թատերական ներկայացում ստեղծի` միկրոթատրոնի ձեւաչափով, որը կներառի մինչեւ 15 րոպե տեւողությամբ փոքրիկ պիեսների բեմադրություններ: Ջեքն ասում է, այդպիսով մարդը կարող է գնալ թատրոն եւ նայել միանգամից մի քանի պիեսի բեմադրություն: Ներկայացումը երիտասարդ, միջին տարիքի եւ ծեր Բորխեսների հանդիպման մասին է: «Դա լինելու է զրույց Բորխեսի հետ, Բորխեսը ինքն իրեն կնայի ինչպես հայելու մեջ, Բորխեսը կզրուցի Բորխեսի հետ»,-ասաց մեր զրուցակիցը:
Նա ասաց, այս պահին փնտրտուքի մեջ է, թե ով է մարմնավորելու Բորխեսին, պետք է դերասանը նման լինի գրողին, եթե ոչ ֆիզիկապես,ապա գոնե հոգով: «Ուզում եմ կարծրատիպերից զերծ մի բան ստանալ, որտեղ դերասանը համոզիչ կխաղա Բորխեսին, բայց պարզունակ նմանակում չպետք է չլինի: Բորխեսի պարագայում շատ կարեւորվում են բառն ու խոսքը»,-հավելեց նա:
Գոհար ՀԱԿՈԲՅԱՆ
