«Հայանտառ»-ի Սիսիանի մասնաճյուղի տնօրեն, «Քաղաքացիական պայմանագիր» խմբակցության պատգամավոր Կարեն Համբարձումյանի եղբայր Տիգրան Համբարձումյանը վիրավորական, հայհոյախառն արտահայտություններ է գրել ֆեյսբուքի օգտատեր, Մոսկվայից Հայաստան եկած բլոգեր Մերի Տոմոյանի ուղիղ եթերի ժամանակ։
Մերին Սիսիանի զոհված զինվորականների պանթեոնից ուղիղ եթեր է մտել՝ նշելով, որ գումարը վաղուց փոխանցված է, իսկ տղաների տապանաքարերը դեռ տեղադրված չեն։ Մերին քննադատել է Սիսիանի համայնքի ղեկավար Արմեն Հակոբջանյանին՝ նշելով, որ Սիսիանում «տեր չկա, համայնքի ղեկավարի պաշտոնակատարը չի մտածում համայնքի մասին»։ Մերիի ուղիղ եթերի տեսագրությունը այստեղ։
Հուզմունքից Մերին վիրավորել է նաեւ Սիսիանի համայնքի ղեկավարի պաշտոնակատարին, ինչը, հավանաբար, բարկացրել է Տիգրան Համբարձումյանին։ Մերի Տոմոյանը Aravot.am-ի հետ զրույցում նշեց, որ ինքը չի հրաժարվում եթերի ժամանակ ասածներից։ «Բայց նա անմահացած հերոսների ծնողներին է նաեւ վիրավորում, չեմ խուսափի ասել՝ նաեւ ահաբեկում է այդ մարդկանց»,-նշեց Մերին։
Կարդացեք նաև
Վերջինս իր էջում տեղադրելով Տիգրան Համբարձումյանի գրառումները՝ կառավարության, մասնավորապես վարչապետ Նիկոլ Փաշինյանի, շրջակա միջավայրի նախարար Հակոբ Սիմիդյանի, Սյունիքի մարզպետ Ռոբերտ Ղուկասյանի ուշադրությունն է հրավիրում նման պաշտոնյայի վարքագծին։ Փորձեցինք պարզաբանումներ ստանալ Տիգրան Համբարձումյանից։ «Զբաղված եմ, հետո կզանգահարեք»,-կտրուկ ասաց նա՝ անջատելով հեռախոսը։ Ամեն դեպքում, Aravot.am-ը պատրաստ է ներկայացնելու նրա տեսակետը եւս։
Նշենք, որ Տիգրան Համբարձումյանը, մոտ մեկ ամիս է՝ նշանակվել Սիսիանի անտառտնտեսության տնօրեն։ Ըստ մամուլի հրապարակումների՝ նրա նշանակումը կապված է Սիսիանում սեպտեմբերի 25-ին կայանալիք ավագանու համամասնական ընտրությունների հետ, որպեսզի ձայներ ապահովի «Քաղաքացիական պայմանագիր» կուսակցության ցուցակը գլխավորող, Սիսիանի համայնքի ղեկավարի պաշտոնակատար Արմեն Հակոբջանյանի օգտին։
Տիգրան Համբարձումյանի լուսանկարը՝ նրա ֆեյսբուքյան էջից
Արմեն ԴԱՎԹՅԱՆ
