«Իշխանությունը մոլորեցնում է, երբ ասում է, թե նախապայմաններ չկան։ Կան հստակ նախապայմաններ։ Արցախյան ճակատում զիջումներն իրավական հիմք են ստանում։ Մյուս պահանջն այն է, որ ՀՀ-ն ճանաչի Թուրքիայի ներկայիս սահմանները եւ հրաժարվի ցեղասպանության ճանաչման միջազգային գործընթացից։ Ակնհայտ է, որ այդ հանդիպումներում խոսակցությունները սրանց մասին են, այլապես մեկ հանդիպմամբ կհաստատվեին դիվանագիտական հարաբերություններ, կբացվեին սահմանները։ Իշխանությունն ընդունել է Թուրքիայի պայմանները եւ գնում է նոր զիջումների»,-Ֆրանսիայի հրապարակում այսօր դիմադրության շարժման հանրահավաքի ժամանակ հայտարարեց ԱԺ «Հայաստան» խմբակցության պատգամավոր Իշխան Սաղաթելյանը՝ անդրադառնալով վերջերս կայացած ՀՀ-ի եւ Թուրքիայի բանագնացներ Ռուբեն Ռուբինյան-Սերդար Քըլըչ հերթական հանդիպմանը։
Իշխան Սաղաթելյանը հիշեցրեց՝ 2020թ․-ի պատերազմի օրերին Նիկոլ Փաշինյանը հայտարարում էր, որ Թուրքիայի միջոցով Մերձավոր արեւելքից Ադրբեջան են տեղափոխվել վարձկան-ահաբեկիչներ, որ Թուրքիան վերադարձել է Հարավային Կովկաս՝ շարունակելու հայոց ցեղասպանությունը․ «Մինչդեռ օրեր առաջ Էրդողանին տոն էր շնորհավորում։ Մեզ մոլորեցնում են, թե պետք է ընդունել թուրքերի պահանջները, որ չկոտորվենք։ Իրականում կոտորվելու ենք, քանի դեռ այս դավաճան իշխանությունը գոյություն ունի»։
Լուիզա ՍՈՒՔԻԱՍՅԱՆ
