«ՀՀ-ի այսպես կոչված իշխանության քաղաքական որոշման արդյունքում կրկին հայ մահացավ, ավելի ճիշտ՝ կրկին հայ սպանեցին։ Արմեն Գրիգորյանը սպանվեց իշխանության ձեռքով՝ նրա կամակատար քննիչի, դատավորի, դատախազի անմիջական մասնակցությամբ»,-Ֆրանսիայի հրապարակում այսօր դիմադրության շարժման հանրահավաքի ժամանակ հայտարարեց ԱԺ «Հայաստան» խմբակցության պատգամավոր Իշխան Սաղաթելյանը։
Հիշեցնենք, որ կինոպրոդյուսեր, դիմադրության շարժման գաղափարակից Արմեն Գրիգորյանն այսօր կտրուկ վատացավ դատական նիստի ընթացքում․ նրա կյանքը փրկել չի հաջողվել։ Արմեն Գրիգորյանը մեղադրվում է ազգային թշնամանք հարուցելու համար։
«Երեկ էլ ՀՅԴ բյուրոյի անդամ, Ֆրանսիայի հայկական կազմակերպությունների համակարգող խորհրդի նախագահ Մուրադ Փափազյանը, որը հայ դատի համար հսկա աշխատանք է արել, պաշտպանել Արցախն ու ՀՀ-ն, Հայաստանի օդանավակայանում ստացել է ՀՀ իշխանության որոշումը, որ ինքն անցանկալի անձ է, եւ նրա մուտքը հայրենիք արգելված է։ Սա թուրքական իշխանության հստակ պահանջն է՝ մեկուսացնել եւ չեզոքացնել բոլոր այն հայերին, որոնք պայքարում են ՀՀ-ի համար։ Դեռ այս երկրում կա՞ն մարդիկ, որոնք չեն հավատում, որ սրանք կոնկրետ ծրագրով են եկել ու տունը նստած՝ սպասում են թուրքին»,-շարունակեց Իշխան Սաղաթելյանը։
Նա նշեց, որ այսօր որոշել էին խոսել շարժման հետագա անելիքների մասին, սակայն հաշվի առնելով այսօր տեղի ունեցածը՝ օրակարգի մասին մանրամասն ու անկեղծ խոսք կհնչի առաջիկա՝ մյուս հավաքի ժամանակ․ «Մի բան վստահեցնեմ, որ հետքայլ չկա։ Այս սերիական մարդասպանի վերջը պետք է գա։ Ասում էինք, որ վրաերթի ենթարկված կինը Նիկոլի վերջին զոհը պետք է լինի, բայց այդպես չեղավ։ Սրա հեռացմանը պետք է հասնել, այլ տարբերակ չկա»։
Կարդացեք նաև
Լուիզա ՍՈՒՔԻԱՍՅԱՆ
