Ֆրանսիայի ազգային տոնի առիթով Հայաստանում Ֆրանսիայի դեսպան տիկին Անն Լույոն ընդունելություն էր կազմակերպել: Նախ հնչեցին Ֆրանսիայի Հանրապետության եւ Հայաստանի Հանրապետության օրհներգերը՝ բաս բարիտոն Ադամ Բարոյի կատարմամբ. այնուհետեւ ելույթ ունեցան ՀՀ-ում Ֆրանսիայի դեսպանն ու ՀՀ փոխվարչապետ Մհեր Գրիգորյանը:
«Մեծ հուզմունքով եմ դիմում ձեզ, քանի որ վերջին անգամ հուլիսի 14-ը նշվել է 2019-ին: Այդ ժամանակից ի վեր Հայաստանը կրել է պատերազմի եւ Քովիդ 19-ի ծանր հարվածները, մտքերս նրանց հետ են, ովքեր զոհվեցին այդ ընթացքում: Այսօր Եվրոպան խորապես ապակայունացվել է Ուկրաինայի դեմ ուղղված չարդարացված ագրեսիայի պատճառով, որն արդեն իսկ բազմաթիվ զոհեր է տվել, եւ որը մենք խստորեն դատապարտում ենք: Ժողովրդավարությունը վտանգված է բազմաթիվ շրջաններում»,-ասաց Հայաստանում Ֆրանսիայի դեսպանը:
Ի թիվս այլնի, դեսպանն իր խոսքում նշեց, որ Ֆրանսիան վերջին 6 ամիսների ընթացքում իրականացրել է ԵՄ խորհրդի նախագահությունը, Ֆրանսիայի առաջնահերթությունների թվում է Եվրոպայի ինքնիշխանության ամրապնդումը, որպեսզի կարողանա հավակնոտ երկխոսություն վարել հեռավոր ու մերձավոր հարեւանների հետ, ինչպես դա արվում է Հայաստանի դեպքում:
Կարդացեք նաև
Նա անդրադարձավ հայ-ֆրանսիական կապերին եւ հանուն ժողովրդավարության՝ ընդհանուր հանձնառություններին: «Հայաստանը վճռականորեն ընտրել է այդ ուղին եւ խիզախորեն հետամուտ է օրենքի գերակայության ամրապնդմանն ուղղված բարեփոխումներին՝ թույլ չտալով, որ իրեն շեղեն այդ նպատակից: Մենք ողջունում ենք այդ հանձնառությունը, ինչպես նաեւ ՀՀ կառավարության հետ երկխոսության անկեղծությունը: Բոլորս գիտենք, որ ժողովրդավարությունը երկար գործընթացի եւ հասարակության բոլոր բաղադրիչների հետ երկխոսության արդյունք է: Դուք գիտեք՝ մենք ձեր կողքին ենք՝ հանուն երիտասարդության ապագայի եւ երկրի անվտանգության համար անհրաժեշտ այս գործընթացում: Հանուն անվտանգության Ֆրանսիան աջակցում է տարածաշրջանում կայուն խաղաղության հաստատմանը, որը կերաշխավորի տարածաշրջանի բոլոր բնակիչների, այդ թվում՝ Լեռնային Ղարաբաղի հայերի անվտանգ ապրելու իրավունքը:
Այս համատեքստում Ֆրանսիան, ինչպես նաեւ ԱՄՆ-ը լիովին հավատարիմ է մնում Մինսկի խմբի համանախագահի իր դերին, Ֆրանսիան սատարում է այս ուղղությամբ Եվրամիության կողմից գործադրվող ակտիվ ջանքերը»:
Գոհար ՀԱԿՈԲՅԱՆ
