«Արփի լիճ» ազգային պարկի տնօրեն Մուշեղ Մուրադյանն Aravot.am-ի հետ զրույցում տեղեկացրեց, որ այս տարի ավելացել է լճի ջրի պաշարը։ Սրան նպաստել են հորդառատ անձրևներն ու սարերում կուտակված ձյան շերտը, որ հալվում, թափվում է լիճը։ Ըստ մեր զրուցակցի, կատարվել է նաև իրենց երազանքներից մեկը՝ ի հայտ են եկել նոր ձկնատեսակներ։
«Օրինակ՝ սազանը մեր տարածքում կարելի էր ասել վերացել էր, բայց հիմա ունենք, ձկնորսները ևս բազմաթիվ են․ օրվա ընթացքում 200-300 ձկնորսներ ենք ունենում։ Մենք թույլատրում են սիրողական ձկնորսություն իրականացնել, բայց նրանք, բնականաբար, ձեռնունայն չեն գնում Արփի լճի տարածքից, գոնե առնվազն 3-4 ձուկ իրենց ցանկությամբ տանում են տուն։
Մոնիթորինգի արդյունքները ցույց են տվել, որ մանրաձուկն անզեն աչքով անգամ բազմաթիվ ափերի մոտ երևում է, ցանկացած մարդ կարող է մոտենալ և տեսնել։ Լճում առկա են 13 ձկնատեսակներ՝ սազանը, կարասը, կարպը, կարմրախայտը, կովկասյան թեփուղը։ Սրանք հիմնական հանդիպող ձկնատեսակներն են։
Կարդացեք նաև
Ձկնորսությունը նաև սոցիալական խնդիր է լուծում, ձկնապաշարի ավելացման հետևանքով նաև թռչնատեսակներ են ավելացել։
Մեր մոնիթորինգի արդյունքները ցույց են տվել, որ հաշվառված թռչնատեսակները եռապատկված են։ Քաջահավը Կարմիր գրքում գրանցված թռչուն է, այս տարի հյուրընկալվել է մեզ։ Նախկինում՝ 5-6 տարի առաջ եղել է, բայց երկար ժամանակ չէինք հանդիպում, հիմա նորից եկել են։Հետաքրքրվում ենք՝ բնադրե՞լ են, թե՞ ոչ։
Այս տարի տարածքում նկատել ենք նաև անգղերի, նաև իմ ֆեյսբուքյան էջով տեսանյութ էի հրապարակել՝ վերնագրելով «անգղերի թռիչքը», որը չքնաղ էր․ մեր սարերում էին սավառնում։ Հավանաբար դա ևս նորություն է Արփի լիճ ազգային պարկի տարածքում։
670 տեսակի բուսատեսակներ կան, բարձրակարգ բույսերից են կովկասյան հովտաշուշանը, հիրիկը, հիրիկ ցանցավորը, Հայաստանում միայն մեզ մոտ առկա դեղին կոկոռը, այս պահին էլ իր ծաղկման ժամանակն է՝ հին Ախուրյանի հունի վրա է իր այսպես ասած բնադրավայրը, իր աճելու, զարգանալու տարածքը»,- ներկայացրեց Մուշեղ Մուրադյանը։
Նա ասաց, որ դեղին կոկոռը Ալվար տեղամասի արգելոցում է, բայց զբոսաշրջիկներին անցաթղթերով թույլատրում են տեսնել ու հիանալ մեր երկրի գեղեցկությամբ։
Ի դեպ, ըստ մեր զրուցակցի, ավելացել է զբոսաշրջիկների թիվը, որոնց մեծ մասը արտերկրից են։
Ըստ Մուշեղ Մուրադյանի, տարածքում հայտնվել են նաև մեծ թվով գայլեր, արջ՝ իր քոթոթներով, մեծ թվով աղվեսներ ու նապաստակներ։ Արգելոցի տարածքում գտնվող մեկ սև արագիլի փոխարեն արդեն կա 14-ը։
Այս թեմաներին կանդրադառնանք ավելի ուշ։
Նունե ԱՐԵՎՇԱՏՅԱՆ
