Ինչպես հայտնել էինք, այսօր իշխանական խմբակցությունը որոշել է ընդդիմադիր պատգամավորների մեծ մասին մանդատից զրկելու հարցով առայժմ չդիմել ՍԴ։ Տեղեկությունը հայտնած ԱԺ փոխնախագահ Ռուբեն Ռուբինյանը լրագրողների հետ զրույցում պատասխանեց նաեւ մի շարք այլ հարցադրումների։
-Ո՞րը կլինի իշխանության որոշումը, եթե սեպտեմբերին ընդդիմությունը վերադառնա Նիկոլ Փաշինյանի հրաժարականի գործընթացի նախաձեռնությամբ։
-Իրենց փողոցային շարժման պահանջը վարչապետի հրաժարականն էր։ Այն ավարտվեց նրանով, որ ԱԺ մեծամասնությունը պաշտոններից հեռացրեց Վահե Հակոբյանին եւ Իշխան Սաղաթելյանին, մյուսները հրաժարվեցին պաշտոններից, երկուսն էլ դրեցին մանդատները։ Ենթադրում եմ, որ նման գործընթացի դեպքում այն կարող է ավարտվել այլ պատգամավորների մանդատները դնելով։ Ամեն դեպքում, իրենց ցանկացած գործողություն բերում է իրենց շարքերի նոսրացմանը։
-ՔՊ-ում էլ կան պատգամավորներ, որոնց բացակայությունների թիվը մեծ է, ինչո՞ւ այդ հիմքով ԱԺ խորհուրդը չի քննարկում նրանց մանդատներից զրկելու համար ՍԴ դիմելու հարցը։
Կարդացեք նաև
-ՔՊ-ում չկան պատգամավորներ, որոնց բացակայությունների շեմը հատել է այն կետը, որից հետո ծագում է ՍԴ դիմելու հարցը։ Այս նստաշրջանի համար ՍԴ չենք դիմելու։ Եթե հաջորդ նստաշրջանում լինեն բացակայություններ, կրկին ավտոմատ կերպով հարցը գալու է օրակարգ։
-ՔՊ-ում կայի՞ն պատգամավորներ, որոնք դեմ են եղել ՍԴ դիմելուն, մասնավորապես՝ արեւմտամետ դիրքորոշում ունեցողները։
-ՔՊ-ում չկան արեւմտամետներ, ՔՊ-ում բոլորը հայաստանամետ են։ Մեր բոլոր քննարկումներում կարծիքները տարբեր են, եւ դա շատ նորմալ է ․․․Եվ, ի վերջո, անառակ որդիներին պետք է վերադառնալու հնարավորություն տալ։ Չեմ ուզում թյուր կարծիք ստեղծվի, թե մենք առանձնապես փափագով սպասում ենք ընդդիմության վերադարձին խորհրդարան։ Անձամբ ինձ մեկ է, բայց մենք մեր կողմից հնարավորությունը պահում ենք։ Արդեն բացատրել եմ, թե ինչու։ Կգան, թե ոչ, իրենց որոշումն է։ Եթե չվերադառնան, ԱԺ նիստերը կունենան ավելի բարձր որակ, զերծ կլինեն վիրավորանքներից, անիմաստ մտքերից, պոպուլիզմի անիմաստ դրսեւորումներից։
Լուիզա ՍՈՒՔԻԱՍՅԱՆ
Հայտնի մեթոդ է՝ մարդաշատ վայրում գողության ժամանակ գողը գոռում է. «Բռնե՜ք գողին», ցույց տալով մեկ ուրիշ «անառակ որդու»: