2023թ․-ից ուժի մեջ մտնող՝ ՀՀ ընտրական օրենսգրքում փոփոխությունների փաթեթի համաձայն կուսակցությունների դաշինքների անվանումներն այլեւս չեն կարող պարունակել անձնանուն, պետական կամ ՏԻՄ մարմինների անվանումներ եւ շփոթելու աստիճան դրանց նման անվանումներ ու հոլովաձեւեր։ Այս մասին այսօր ԱԺ արտահերթ նստաշրջանում ներկայացնելով ՔՊ-ի հեղինակած՝ ընտրական օրենսգրքում փոփոխությունների նախագիծը՝ հայտարարեց ՔՊ խմբակցության պատգամավոր Արթուր Հովհաննիսյանը։
«Խոսքը նրա մասին է, որ ընտրություններից առաջ ձեւավորվում են դաշինքներ՝ անուն ազգանուններով։ Մենք ընտրել ենք համամասնական ընտրակարգը, եւ, ըստ էության, հաջողել դրանում, գրանցել ընտրական գործընթացի առաջընթաց։ Իսկ անուն ազգանուններով դաշինքներով ընտրությունների մասնակցելը մեծամասնական ընտրակարգի տրամաբանության մեջ է։ Կուսակցությունները եւս չեն կարող անվանման մեջ պարունակել անձնանուն»,-տեղեկացրեց Արթուր Հովհաննիսյանը։
Կառավարության դիրքորոշումը նախագծի վերաբերյալ դրական է։ «Արտախորհրդարանական ընդդիմությունը եւս մասնակցել է քննարկումներին, իսկ խորհրդարանական ընդդիմությունը` կարծես թե` ոչ։ Բայց նրանց հրավերներ հղվել են»,-իր հերթին ասաց հարցի հարակից զեկուցող, ՀՀ արդարադատության փոխնախարար Երանուհի Թումանյանցը։
Հիշեցնենք, որ ընդդիմադիր խմբակցությունների պատգամավորները այս նստաշրջանին եւս չեն մասնակցում։
Կարդացեք նաև
Լուիզա ՍՈՒՔԻԱՍՅԱՆ
