«Ֆեյսբուքյան» ուղիղ միացմամբ այսօր ՀՀԿ փոխնախագահ, ԱԺ նախկին պատգամավոր Արմեն Աշոտյանն անդրադարձավ ընդդիմության հասցեին հնչող այն պնդումներին, թե նրանք ՀՀ-ում տարածում են ադրբեջանական թեզեր։ «Ընդդիմության գլխավոր թեզն այն է, որ Արցախը չի կարող լինել Ադրբեջանի կազմում։ Դուք դա կարո՞ղ եք ասել։ Ես, իմ նախագահը կարող ենք ասել։ Ինքն է առաջինը դա ասել։ Ընդդիմությունը կարող է դա ասել ու այդ ուղղությամբ աշխատել, իսկ դուք կարո՞ղ եք։ Մի՞թե ադրբեջանական կարող է լինել Արցախը երբեք չի լինելու Ադրբեջանի կազմում թեզը։ Ես որ չգիտեի»,-նկատեց Արմեն Աշոտյանը։
Նա հարցադրում արեց, թե ո՞րն է նշյալ պնդում անողների թեզը՝ Արցախի կարգավիճակի ակնկալիքն իջեցնե՞լը, նշաձող իջեցնե՞լը։ Արմեն Աշոտյանի խոսքով՝ իրականում ադրբեջանական են հենց Նիկոլ Փաշինյանի այն թեզերը, թե նախկինում եղած բանակցային ժառանգությամբ Արցախը թողնվելու էր Ադրբեջանի կազմում․ «Դա Ալիեւի եւ նրա հոր թեզերն են։ Բարձր ամբիոններից Նիկոլ Փաշինյանը տարածել եւ տարածում է ադրբեջանական թեզեր, թե ՄԱԿ-ի անվտանգության խորհրդի 93թ․-ի բանաձեւերը, իր կարծիքով, լուծել են Արցախի հարցը։ Մեկ էլ Ադրբեջանն է այդպես ասում։ Կամ, երբ համաձայնում եք Շառլ Միշելի մոտ, որ «Լեռնային Ղարաբաղ»-ի փոխարեն գրվի «Ղարաբաղ», իսկ «Լեռնային Ղարաբաղի ժողովուրդ»-ի փոխարեն՝ «Ղարաբաղի էթնիկ հայ բնակչություն»։ Ավելին՝ ՀՀ-ում տարածում են այնպիսի հիմար, անբարո ու սուտ թեզեր, որոնք անգամ ադրբեջանցիները չեն տարածում։ Օրինակ, որ վարչատարածքային բաժանման մասին օրենքով Արցախն արդեն հանձնվել էր Ադրբեջանին։ Անգամ Ալիեւը կյանքում չի ասել այնպիսի հիմարություն, թե «Մադրիդյան սկզբունքներով» Արցախն արդեն իսկ մնացել էր Ադրբեջանի կազմում»։
Լուիզա ՍՈՒՔԻԱՍՅԱՆ
