Հայկական ծանրամարտի ամենատիտղոսակիր ներկայացուցիչներից մեկը՝ գերծանր քաշային Գոռ Մինասյանը, տեղափոխվում է Բահրեյնի հավաքական: Սա այն բացառիկ դեպքն է, որ մեր առաջատար մարզիկը փոխում է ազգային ֆեդերացիան եւ դա ողջունելի է:
Բանն այն է, որ աշխարհի ու Եվրոպայի առաջնություններում երկիրը միեւնույն քաշային կարգում կարող է ներկայացնել առավելագույնը երկու ծանրորդ: Եվ ուրախալի է, որ Հայաստանի ազգային հավաքականում տեղ զբաղեցնելու համար սուր մրցակցություն է սկսվել գերծանր քաշային երեք հավասարազոր ծանրորդների՝ Վարազդատ Լալայանի, Սիմոն Մարտիրոսյանի եւ Գոռ Մինասյանի միջեւ, որոնք եղանակ են ստեղծում համաշխարհային ծանրամարտում: Ստեղծված իրավիճակում Հայաստանի դրոշի ներքո հանդես գալու համար նրանցից մեկնումեկը կամ ստիպված է իջնել մեկ քաշային կարգ ներքեւ, ինչը անհնարին է, կամ պետք է նոր բարձունքներ նվաճելու մտքից եւ իրական հնարավորությունից հրաժարվի ու ավարտի մարզական կարիերան:
Բարեբախտաբար, ստեղծվել է լավագույն տարբերակը: Գոռ Մինասյանն, անշուշտ, ֆեդերացիայի ղեկավարության եւ հավաքականի մարզիչների հետ խորհրդակցելով, ընդունել է Բահրեյնի ծանրամարտի ֆեդերացիայի առաջարկը: Գյումրեցի մարզիկը նպատակ ունի մասնակցել 2024 թվականին Փարիզում կայանալիք ամառային օլիմպիական խաղերին եւ պատրաստվում է պաշտոնական մրցումներում պայքարել օլիմպիական վարկանիշ ձեռք բերելու համար:
Աշոտ ՀԱԿՈԲՅԱՆ
