«Ադրբեջանի ԱԳ նախարար Բայրամովը հայտարարել է, որ Շուշիում առաջիկայում դիվանագիտական մեծ գիտաժողով է լինելու՝ միջազգային հանրության ներկայացուցիչների, դիվանագետների մասնակցությամբ։ Համաժողովում զեկույցներ են լինելու ՀՀ-ի կողմից Ադրբեջանի օկուպացված տարածքներում եւ պատերազմի օրերին իրականացրած ահաբեկչական գործողությունների, ցեղասպանության վերաբերյալ»,-«Հայելի» մամուլի ակումբում լրագրողների հետ հանդիպմանն այսօր հայտարարեց ԱԺ նախկին պատգամավոր Նաիրա Զոհրաբյանը։
Նա դիմեց վարչապետի տիկնոջը․ «Տիկին Աննա Հակոբյան, որ պատրաստվում էիր Մեհրիբանի հետ թեյ խմել Շուշիում, գուցե գնաս եւ մասնակցե՞ս, հակափաստարկնե՞ր ներկայացնես։ Պատրաստ էիք ձեր որդուն տալ Ալիեւին։ Կարիք չկա։ Փոխարենը կարող եք գնալ եւ մասնակցել օրակարգին։ Վստահ եմ՝ պատրաստ կլինեն ձեզ ուղեկցել»։
Նաիրա Զոհրաբյան
Նաիրա Զոհրաբյանը շարունակեց․ «Ի դեպ, պատրաստ եմ Աննա Հակոբյանին ուղեկցել, որպեսզի Շուշիում Ադրբեջանի երեսին ասեմ, թե իրականում ով է ցեղասպանն ու հանցագործը։ Պահանջեք ամբիոն ու գնացեք, տիկին Հակոբյան։ Կարծում եմ՝ ձեզ կտրամադրեն, եւ ներկայացրեք առաջին, վերջին պատերազմներում եղածը, Մարաղայի, Սումգայիթի, Բաքվի ջարդերը։ Ասածս հեգնանք չէ։ Պահանջեք դա որպես առաջին տիկին։ Գնացեք, փաստեր ու տեսանյութեր ներկայացրեք, թե ինչպես էր Ադրբեջանը գործում միջազգային բոլոր կոնվենցիաներին հակառակ, գլխատում զինվորներին ու քաղաքացիներին։ Ես ձեզ անձամբ փաստեր եւ ապացույցներ կտրամադրեմ»։
Լուիզա ՍՈՒՔԻԱՍՅԱՆ
